Khawzawl leh Biate inkar kawng siam tha leh

March ni 24, 2024-a Khawzawl Biate PMGSY Road kawng siam tha lo nia sawi video darh chungchang chu March ni 25, 2024-a Contractor leh Chawngtlai All NGO CC ten an sawi ho hnuah Contractor ten kawng siam that hna an thawk leh.
Khawzawl – Biate Road hi Km 60 a thui a ni a. A siam hna hi hmun sawm (Group A- Group J) a then sawm niin Contractor Pakhatin Km 6 zel kawng siam that hna hi an thawk a. He kawng hi Project Division IV, PWD, Aizawl ten a tirah an enkawl a, June ni 5, 2023 atang khan PWD, Khawzawl Division kutah hlan leh chauh niin March 31.03.2024 a zawh fel hman tura ruahman a ni.
He kawng siam tha lo ni a sawi hi Group B (6.00-12.00 kmp) huam chhunga awm niin Contractor chu P. Lalbiaka, Luangmual a ni a. Black Topping that tawk lohna lai hmun hi ram neituten khawih an phal loh avangin laih loha dah reng a ni a, Contractor ten Blacktopping an khawih laiin khaw mipui ten an ngenna angin a theih chin chinah kawng laih zauh hna hi thawh leh a ni a, Ni 22.3.2024 khan mipuite ngenna angin Blacktopping hna hi thawh leh nghal a ni. Hna thawh a nih lai hian a hmunah Chawngtlai khawtlang hruaitute pawh an awm ve nghe nghe a. A tha tawk lo a ni tih hriat chhuah nghal a ni a, Contractor leh Khawtlang hruaitute inbe remin siam that leh tura ruahman nghal a ni.
PWD Khawzawl Division EE, Jenny Lalramchhuani chuan he thil thleng hi pawi a tih thu sawiin , blacktopping hnathawh a nih chuan thil thleng palh ve fo thei a ni, a ti a. Kawng tha lo chu siam that leh a nih tur thu a sawi bawk. Contrator ten hna an thawk tha tawk lo a nih chuan Payment a pek dawn loh thu a sawi bawk a ni.