Khawzawlah LPG home delivery

Khawzawlah eirawngbawlna gas hmangtute kawtkaia thlen turin an inpeih tawh a, September 18 atanga tih tan tum a ni.
Khawzawl district bawrhsap K Vanlalthiana kaihhruaiin Nilaini khan LPG home delivery chungchang hi sawi a ni a. Home delivery kalpui turin a buaipuituten an inpeih tawh tih an sawi. September 18 hian tan theih an inring tih sawi niin, tha taka kalpui a nih theih nan leh mi tam zawk a thlen theih dan tur sawi ho a ni.
Bawrhsap chuan home delivery hlawhtlin nana buaipuitu Mizoram Consumer’s Union Khawzawl, gas agency, VC leh tha leh ngaihtuahna thawh zawng zawngte hnenah lawmthu a sawi a ni.