Khawzawlah supply office hawng

Khawzawlah supply
office hawng
District Civil Supplies Office Khawzawl District office thar chu Thawhlehni khan deputy chief minister Tawnluia’n a hawng.
Sawrkarin district tharte hmasawnna leh changtlunna a ngaipawimawh a, district tharah district office tam ber chu hawn a ni tawh tih deputy chief minister hian a sawi. Khawzawlah FCI kudam sak mek a nih thu leh Khawhaiah supply kudam sak mek a nih thu a sawi a. DCSO office hawn thar chuan supply thila Champhai kal ngai fo chu sukiangin, hmun leh hmunah district mipuiin an mamawh an tifel thei tur chu thil lawmawm tak nia a hriat thu a sawi a ni.
Sawrkar term kal mekah mipui nitin mamawh – buhfai, gas, oil leh a dangte phuhruk kawngah Supply department hnathawh fakawm a tih thu Tawnluia hian a sawi a. Hrileng karah pawh chaw leh nitin mamawh hnianghnar taka kan nei thei kha an hnathawh that zia tilangtu a ni, tiin a sawi. “Tunhma lama Supply department hnuaia harsatna awm thin hrang hrang – buhfai tha lo, buhfai buk dik tawk lo, supply phurtute harsatnate chu a tlem tial tial nia a hriat thu sawiin, gas buk dik zawng pawhin hma a sawn zel chu department-in theihtawpa hma a lakna rah a ni,” a ti a. Mumal taka consumer goods chhawpchhuah kawnga hma an laknaah FCS&CA department chungah lawm thu a sawi a ni.
Khawzawl DCSO hi Khawzawl Hermon Vengah a awm a. An enkawlna hnuaiah hian Kawlkulh Principal Distribution Centre, Khawzawl Sub-Distribution Centre bakah khaw 5 – Biate, Sialhawk, Rabung, Lungpho leh Khawhai-a Fed Centre a awm dawn a ni.