Kim-a’n Russia lut, khawvel mit fu thup

Vladimir Putin leh Kim Jong Un te chuan inanna tam tak an nei.
An pahnihin an chhuak khat dun hle a. Kremlin leader chuan kumin hian Russia a la chhuahsan lo. Kim erawh chuan kum li chhungin an ram a la chhuahsan lo thung.
Russia leh North Korea hi ‘rogue states’ anga ngaih a ni a, khawvelin nasa taka a hrek mek ve ve an ni bawk.
Ram pahnihte hian United States ‘hegemony’ chu an tei thei lo ve ve bawk a.
Hmelma intawm neih chuan hruaitute lungrualin a siam thei thin. Chu chu Putin leh Kim-ah a thleng dik chiah bawk a. Chu tak chu kum 2023 geo-political dinhmun diktak niin a lang bawk.
Vladimir Putin leh Kim Jong Un te hian inzawmna thuk tak an neihin hlawkna a nei tih an hrechiang bawka sawi a ni.

Kremlin tana hlawkna
Kremlin tan eng nge a hlawkna awm tur?
North Korea hian defence industry lian tak neiin theihna sang tak a nei bawk a. Ukraine-a Russia-in indona a kalpui mek zelah Pyongyang chuan Moscow hnenah ralthuam pawimawh a pe thei dawn a ni.
Washington chuan Kremlin chu ralthuam thila purah puhin Russia leh North Korea te chuan ammunition leh artillery shell inpek a nih theih nan inbiakna an nei thui tawh tiin an sawi bawk.
Russian officials te chuan engmah sawi an la nei duh lo va, mahse, thil hrang hrang landanah Russia leh North Korea te chuan military cooperation lam tihchak zual an tum ngei nia sawi a ni bawk a.
July thla khan Sergei Shoigu chuan North Korea tlawhin Russian defence minister Soviet Union kehchhiat hnua North Korea tlawh leh hmasa ber a ni a. Korean armistice 70-na lawmna neihah Kim Jong Un chuan Shoigu chu a hruai kual vel a ni.
Hetih lai hian Russian foreign minister hlui Andrei Kozyrev chuan, “North Korean hnena ralthuam an ngen a nih ngat chuan Russian ‘great power’ tana zahthlak tawp khawkah ka ngai” tiin a sawi a. “Khawvel ram tlawhserh berah ram ropui inti chuan military supply dilin a kal tur a ni lo,” tiin a sawi.
Mahse Russian president Vladimir Putin chuan world order chu a duh dana hawitir tumin chet a la tlat a, Russia duh danin world order thar chu awm ngei se a duh bur a. Chumi atan chuan North Korea nena military cooperation chu tihmakmawha ngaih a ni.
Moscow leh Pyongyang inkara arms deal awm chuan thil a thlak danglam chiang dawn hle thung. A hma zawng chuan UN Security Council hrekna North Korea laka kalpuiah pawh Russia chu thlawptu a ni a. Tunah erawh thil a inthlak danglam ngei dawn tia sawi a ni a.
Russia Council on Foreign and Defence Policy Fyodor Lukyanov chuan, “Hun rei tak zawhna awm tawh chu : Eng vangin nge keini Russian te hian hrekna hi kan thlawp? International relations pumpui hi a buai nuai vek a ni,” tiin a sawi a.
“UN hrekna te hi a dik a, hnawl a har khawp ang. Kan vote kan pekna a ni a. Mahse, tunah chuan thil a danglam tawh a, eng vangin nge kan vote kan hnuhkir mai loh ang?” tiin a sawi.
North Korea hian Russia atangin eng nge a beisei ang? North Korea in buh leh bal lama hasratna a neih chhawk zangkhai nan humanitarian aid a beisei ngei ang a. Hei bakah hian Pyongyang chuan Russian technology a bik takin satellite lam a beisei tia sawi a ni bawk a, chung zingah chuan nuclear-powered submarine pawh a tel.
Ukraine indonain kum khat leh a chanve hmel a hmu tawh a, Russia a che chhe miah lo bawk. Mahse, Moscow chuan munition stock a mamawh a. Mahse, chung sawi chuan North Korea puihna tel lovin Russia-in a war machine-ah a tlachham viau dawn tihna a ni lo.
“Putin hi a beidawng hauh lo” tiin foreign minister hlui Andrei Kozyrev chuan a sawi a. “Hun rei tak la daihin a insiam rem thei a. Hrekna hel kual dan ni tin a zawng bawk a. China leh North Korea bakah Africa team te nena thawhho dan a zawng reng bawk a. Chung te chu nakin atan a ni lo, tun atana a mamawh rih chu a ni,” tiin a sawi bawk.
Kim Jong Un hian Russia pan nan hian rel a hmang a, a rel hman hi nuam thei ang bera siam niin North korea VIP train tihmai hi khawvel huap pawhin an larpui hle a ni.
Rel pindan tin te chu nasa taka ven thuap tup niin a tlan muang em em bawk a. A hmaa Vladivostok a pan pawh khan darkar 20 lai kal nan hun a hamng a. Kum 2019 a Donald Trump hmu tura Vietnam a pan pawh khan darkar 60 chuang he rel hmang hian hun a hmang tawh bawk a. Thlawhnaa kal a duh loh vang a ni.