Knockout round lut Bayern

Knockout round lut Bayern
Thawhlehni zan UEFA Champions League knockout round play-off second leg inkhel pakhatah Scotland ram Parkhead khelmual lama 2-1 hnehna chang tawh Bayern Munich chuan an mikhual Celtic lakah hnehna changzo lo mah se 1-1 draw nen vawihnih inkhelh belhkhawmin 3-2 hnehna an chang ta tho a, rinkai zawk an nihna nemnghetin last 16 an lut.
Allianz Arena chhunga entu mipui 75,000 zet pungkhawm hmaah Bavarians khan first half chhungin goal an khung zo lo a, second half-ah pawh goal chhuah hmasa zawkah tangin, chak mamawh Celtic tan Bayern reserve player hlui Nicolas Kuhn chuan Kim Min-jae tihsual hlawkpuiin minute 63-ah mikhual hmahruaina goal a khung a, Brendan Rodgers-a team an phur sauh.
He goal khat hi German-ho tan sut a har ngang ngang khawp mai a, hun pangngai a tawp hman takngial dawn tihah Alphonso Davies chu hun pekbelh minute lina a kal mek laiin a rawn inlar a, Bayern siphurh sutin, Bundesliga giants an tlang zui ta tho a ni.
He goal luh dan chu heti ang hi a ni a; Michael Olise cross chu Leon Goretzka chuan mikhual goal lamah tauhin, Celtic goalkeeper Kasper Schmeichel chuan lo dansak bawk mah se ball perlet chuan goal ruak hmaa a tla a, chu ball him lo zet chu Cameron Carter-Vickers chuan hmunhima sawnchhuah a tum lai takin Davies chuan a lo tawk khalh hman ta a ni.
First half-ah khan Celtic lamin goal khung theihna hun remchang tum li ngawt an bawhpelh a, Kuhn leh Callum McGregor-te’n vawikhat ve ve an thelh bakah Daizen Maeda chuan a chance hmuh vawihnih goal-ah a chantir zo lo a; half time-a thlak a nih hmain England captain Harry Kane pawhin goal kham a hlap per ve bawk.
Celtic lam pawh an beidawng duh bik lo a, Kuhn chuan Manuel Neuer-a ven goal-ah Scot fans phurna siamsak turin goal a khung a; mahse, Bayern siphurh sut tum tankhawh kha a na fuat fuat kher mai a, Joshua Kimmich-a goal tur chu engtin tin emaw Schmeichel chuan dansak hramin, Leroy Sane pawhin goal ban hrulah ball a thawnchhuak phe vuai ve bawk!
Celtic lamin theihpatawpin an hmahruaina humhim tum bawk mah se englai pawha nawrtawm reng Vincent Kompany team chuan kha game-a last kick ni zui taah an siphurh sutin, knock out stage lut tura an mamawh goal an hlawhchhuak zui ta tho a ni.
Football hi a chang chuan a nunrawng thin an tih angin beiseina sang tak nei hman Celtic player-te beidawng leh lungngai kha khelmualah an thu zawi hnawk hlawm a, chutih laiin Bayern lam erawh tlang lawmin corner-ah an tlankhawm tuau tuau thung!
Scottish champion khan Glasgow khuaa an khelmual hman thiama draw tal an hlawhchhuak zo lo kha an tuar a tih loh theih loh a; tha ba nei chunga Germany pan an nih avangin an thawhrim zual a ngai a, minute 180 chhung khan an theihtawp chuan an fight tih a hmuh theih.
Dinhmun him vak loa ding hman Bayern Munich an tlang leh tak avangin season hnuhnung vawi 17 chhung Champions League last 16 an lut kim vek a; European competition-a Scottish club an mikhual tawh zawng zawngah tlawm la pumpelh fai vekin, chutih kawngah chuan vawi sarih an chak a, draw vawi li an nei.
Celtic lam thung hi East Germany an nih lai telin German team an luhkhung tawh vawi 16-ah an chak zo lo fai vek a, draw vawi li neiin, tum 12 ngawt an tlawm haw!
Thawhlehni zana a club hlui Bayern lama goal khungtu Kuhn kha November 2020-a Red Bull Salzburg tana goal khungtu Mergim Berisha hnu lamah German zinga Bayern Munich laka Champions League goal thun leh thei hmasaber niin, March 2014 (last 16)-a Arsenal tana goal thawhtu Lukas Podolski hnu lama German club laka knockout stage goal tilut leh thei hmasaber a ni tel bawk.
Celtic starting XI kum chawhrual kum 28 leh ni 40 kha November 2006 daih tawh Celtic Park mikhual Manchester United laka 1-0 hnehna an sualchhuah hnua Champions League game-a an starting XI upa ber a ni.
Kartawp Zirtawpni hian round of 16 lama intum tur an pawt dawn a, he thu buatsaih lai hian Bayern Munich hmachhawn tur la chiang lo mah se Bayer Leverkusen leh Atletico Madrid zinga a tu emaw zawk zawk an ni ang.