Kohhran leh Sawrkarin an rawngbawlna hmun tur an hai e !

Lalremliana Pachuau
TNT, Hrangchalkawn Lungleia an biak inah chuan, khaw tê rûn tham zet tih tura tam mipate chu inkhawm turin an inzui dul dul a. Minute 10 dáwna rei biak ina luh fel nân hun hman a ngai hial a ni. Sakawrtuichhuna inkulh TBCC Centre lamah lah, TNT-a awmte aia tam leh zual ruihhlo ngaih vanga enkawl mek an la awm bawk. Khawvela ruihhlo ngai enkawlna centre lian bera sawi, Brazil rama mi tih lovah chuan Mizoram hi ruihhlo ngai enkawlna hmun lian ber nia hriat a ni.
Mizoramah hian Addiction Centre 37 zet awmin, inenkawlna hmunte hi englai pawhin a khat vek reng a. TBCC-ah hian khum 900 chuang awm anga chhinchhiah niin, Mizoramah a lian ber a ni. Ruihhlo ngai enkawlna hmuna thawktute tawngkam atanga a lan danin, an mi enkawl zinga tha chhuak ta hi 100-ah 3 pawh an awm meuh lo niin an sawi! Englai pawhin kan ramah thalai sang chuang fé, inenkawlna hmunah awm reng ang an ni a. Anni aia a leta tam ruihhlo ngai, khawlaiah an la awm cheu bawk!
Ruihhlo hian Mizorama chhûng tin tih mai tur min luhchhuahin, harsatna min siamsak ta. Hnathawh tur a vânna apiangah ruihhlo ngai an pung thin tia zirbingnain a lo fiah tawh ngei chu, kan ram dinhmun pawh a rawn ni ta chiah a. He harsatna hian ram hnùk a khawih a, chhûng tin nun a nghawng mek laiin, sawrkar leh kohhran erawh an muthlu mek lawi si a nih hi.
A rama cheng mipui tam lam ngaihtuaha, misawnari thawn chhuak tam ber ram kan nih lai hian, kan ram chhûng ngeiah rawngbawlna tur ram thim tak a awm lawi si a. Mi thiamte chuan ruihhlo ngaih hi natna chi khat, enkawl dam har zet mai a ni an ti a. Ruihhlo ngaite hi taksa, rilru leh thlaraua dam lo an ni tih kan pawm a hun ta. Tin, ram hnùk khawih harsatna lian tak, ram leh hnam innghahna thalai rualte sal tanna a ni tih kan hriat a hun ta bawk.
Ruihhlo ngaite zinga rawngbawlna hi, kohhran hian thûk zawka a luh chilh a hun ta tak zet a. Tuna a inhnamhnawihna ang lek ni lova, zir chianna neia project lian tak siama beihpui a thlak a hun ta takzet a ni. Mahni inchhûngkhûr khawsak rêl fel hmasa zet si lovin, kohhran hian ram thim lamah nasa takin beihpui a thlak a. Tun hma ang lo takin kan ramah, sualin nasa takin kan thalaite nunah bu a khuar ta a. Kan misawnari-na hmun tur kan ngaihtuah thiam a hun ta a nih hi.
Sawrkar thar hnuaiah ruihhlo nasa taka man ni mah se, ruihhlo ngaite zawk buaipui kawnga hmalakna lian tham engmah a neih si loh avangin, ruihhlo mamawhna (demand) englai pawhin a sâng reng a. Chu chuan englai pawhin ruihhlo tawlhrûkna (illegal supply) a awmtir lo thei lo. Ruihhlo ngaite enkawl dam a harsa tih a hriat avangin, India sawrkar phei chuan ruihhlo tite lam hawi ai chuan, la ti ve lo thangthar leh thalai lam hawia insenso a sâwt zawk a ti ta hial mai!
Zoram kohhrante hnena Pathian thuchah hmanhmawh lo thleng ta chu, “Thi tûra hruaite chu chhan chhuak la. Thah mai tûrte chu chhan chhuak thuai rawh” tih thu leh, “|henkhat mei ata la chhuak thuai ula, chhandam rawh u; thenkhat an tisa bawlhhlawh kaina silhfen lam pawh chu tenin, hlau chungin khawngaih rawh u.” tih thu hi a ni ta a. Ezekiela kal tlangin mi sualte an lo dam theih nâna, an sualna avanga vaukhanna kan neih loha mi felte pawh an lo suala vaukhanna kan neih loh chuan, an thisen mawh kan phurh tur thu hrilhin kan awm zui nghal zat bawk!
Tun hnaia Synod lamin camping an buatsaiha luh tum an tam lutuk avangin, harsatna a thlen phah hial a nih kha! |halaite manganna, ruihhlo bawih ata chhuah zalen an duhzia a lo lang a. Hengte hian kohhran hi kai harh thei tak ang maw? Kan ramah hian ram thim mup mai, thim chhah êm êm a awm si a. He ram thim sut ên tum ai chuan, thlahthlama ram thim dang bawh ên a thlang tlat hi, Zoram kohhrante rawng bawl duh dan a ni mek si a nih hi.
Tun hnaiah TBCC chanchin tha lo zet zet hriat tur a tam hle. Mi hrang hrang thu sawi leh thu ziak kan ena lo lang chiang tak chu, Home-a inenkawlna hi phuahchawp ve tak tak, enkawl laite zinga lo awm rei deuh tawhte thawktua lak chawp mai mai, thiamna engmah nei lo ve bawkte enkawlna hnuaiah, ruihhlo ngaite hi hrual an ni a. Pathian thu an ngaihthlakin an nun a siam tha lo a, term an awm zawhah lo chhuakin an nun ngaiah 99% an let leh tluk a ni!
Rehabilitation pangngai tak kan neih a tulzia hi sawrkarin a hriat hmanhmawh a hun takzet tih a lo lang ta a nih hi. CYMA hmalak dan han hriatte hian, a beidawnthlak hle. Ruihhlo ngai an man khawm a, TBCC lama an thawn thlak chuan an duhtâwk der a. An mi thawn thlakte ngaihven zuina an nei ngai lo. Home lianahte hian daktawr, nurse, psychiatrist, counsellor pakhatmah an awm lo vek a! Chuti chungin heng Home liante hi ruihhlo ngaite damna hmun ni turah kan beisei si.
Synod leh MBKHP hnuaia ruihhlo ngai enkawlna hmunte hi, an changkangin a nih tur an thlap an ni a. Mahse, awm thei an tlem êm avangin mamawh an phuhrûk zo si lo! Chuvangin, sawrkar hian kohhran thawhpuia hmalak nachâng a hriat a hun takzet a ni. Tutute emaw Pathian kohna dawng intite home din chawpah kan innghat rei ta. Heng mite rawng bawlna kal tlang hian, tha chhuak alawi an awm ngai bawk si lo. Nunna chân an awm phah zawk hial a, ruihhlo ngaite beidawnna a thük telh telh zawk a nih hi.
Sawrkar leh kohhran hi TBCC chungchang thu darh mek kal tlanga, ben harh an nih loh chuan kan rama ram thim hi a thim zual tulh tulh dâwn a. Chu chuan kan ramah harsatna leh, buaina lian pui a thlen belhtir zel dâwn a ni. Kan ram hian Rehabilitation Home lian tak, daktawr, nurse, psychiatrist, counsellor enkawl, enkawl mekte tâna eizawnna puitling; carpentry, electrician, puan thui, ei siam, thlai chin, kut hnathawh zirna etc theihna awm tel ngei a mamawh ngawih ngawih a.
Chutih laia sawrkar leh kohhranin hmalakna neih a tum miah loha, Pathian kohna dawng intite’n phuahchawp taka an din Addiction Home kal tlanga kan ram damna a thlen an la beisei cheu a nih chuan, kan ramah damna tak tak a thleng ngai dâwn lo. Kum hei leh chen an lo kalpui tawh Addiction Home-te atanga, damna tluantling chang zat niawm han hriat hian, a beidawnthlak ngawih ngawih a lo ni e.