National Highway 306 & 06 kawng siamthat mek chak zawka hna an thawh theih nana National Highway Verification Team chu Ningani khan an thukhawm a, an endikna report pe in hmalak zel dan tur an sawiho.
Bawrhsap chuan tunhnaia ruahsur avanga Kolasib district inkalpawhna kawng chhe lutuk avanga Working Committee an dinin rah tha a chhuah chho zel chu lawmawm a tih thu a sawi a. NHIDCL-in an theih ang tawka an thurel an bawhzuia hmasawnna hmuh tur a awm tan chu lawmawm a tih thu a sawi.
Tunhnaiah Kawnpui leh Khamrang inkar leimin a awm nual avanga inkalpawhna a tibuai a, lirthei thahnem tak kawng laka tangkhang an awm nual leh Durtlang lama lirthei lian kal a ngai chu pawi a tih thu a sawi a. Kolasib SP-in Kawnpui atanga Durtlang lama lirthei lian kal khapna leh Kawnpui leh Khamrang inkar a tlan hun bituk siamna order a tichhuak chu a lawmawm tih sawiin, hei hian chak zawka kawng siamtuten hna an thawh theih nan a pui dawn tih a sawi a ni.
NH 306&06 Kolasib district hi fur ruahtui a tlak tam avangin tunhnaiah inkalpawhna a chhe hle a. He kawng hi NHIDCL leh Mizoram PWD-in chan insema an enkawl a ni. Mizoram chak lakna ber a nih avangin chak zawka hma lak a nih theih nan Working Committee din a ni a. Hemi bawhzui hian sawrkar, khawtlang, pawl leh MJA aiawh telna Verification Team siam a ni bawk. Verification Team hi group thuma then niin, group pathum hian kawng siam hi September 4 khan a thawhkhatna atan an endik a ni.
Kolasib district-a kawng chhe siam Verification Team-in endik
Get real time updates directly on you device, subscribe now.