Kolasibah election hotuten thlirlet

Kolasib district-a assembly constituency pathuma returning officer-te, assistant returning officer-te leh election officer-te chu
district election officer John LT Sanga hoin Thawhtanni thukhawmin, an district-a inthlan buatsaih dan an thlirlet a, vote chhiarna atana ruahmanna hrang hrang an sawi ho bawk.
Kolasib DEO chuan MLA inthlanpuiah Kolasib district-ah tluang taka vote thlak a ni chu lawmawm a tih thu sawiin, inthlan hlawhtling tak buatsaih a nih theih chhan pakhat chu district election official-te, nodal officer-te leh mawhphurhna hrang hrang neitu official-ten an hmazawna mawhphurhna tla tha taka an hlenchhuah vang a ni tih a sawi. Inthlan chu zaa 80 vel zo tawh ang an ni, tiin, hmabak la awm pawh official-te thahnemngaihna leh district mipui thawhpuina azarah tluang taka hlen a nih a beisei thu a sawi.
Thutkhawmah hian Kolasib district-a inthlan buatsaih dan thlirletin, hmalakna chhinchhiah tlak leh zawngchhang thlak deuhte sawi a nih bakah hmasawnna awm theite sawi ho a ni a. Inthlan kaihhnawiha tih tur hmabak awmte thlir ho a ni bawk. Vote chhiarna atana ruat Govt Kolasib College-a counting hall pathum buatsaih dan tur ruahmanna (drawing) chu thlir hoin, hma lak zui dan tur an sawi ho.
Kolasib district-a assembly bial pathuma polling station 89-ah state chhung hmundang rualin November 7 khan tluang takin vote thlak a ni a. Vote thlak nana hman electronic voting machine (EVM)/ voter verifiable paper audit trail (VVPAT) leh inthlanna lehkha pawimawh chu Govt Kolasib College-a strong room ruahmanah sipai venin dahthat a ni a. Election Commission of India atanga thuthar dang a awm a nih loh chuan, December 3 khian chhiar a ni dawn a ni.