Kolkataa Mizoram sawrkar ram hralh tum tawh la let

Chief minister Lalduhoma chuan Kolkata-a Mizoram House hmasa ber awmna, Ballygunge ami, sawrkar kalta in hralh an lo tum chu sum inpe tawh mah se, an lalet leh tih a sawi.
Chief minister sawi danin, he ram hi mimal hnenah sawrkar hmasa khan hralh tumin a buaipui a, inthlan hma deuh khan a lei tura an tih hian an chhiar zat cheng vaibelchhe 38 chuang a lo hlan tawh a ni. He ram hi Kolkata Mizo Welfare, Mizo zirlai pawl, Kolkata Mizoram House-a thawktu leh Mizo awm zawng zawngten an ui hle tih sawiin, “Ram hralhna hmang hian Salt Lake emaw New Town emawa sawrkarin hmunhma hmun dang lei a, a aia tha a sak tura ruahman a nih laiin, a hralh lam chauh buaipuiin, hmun dang lei tuma hmalakna a awm lo,” a ti.
Mizoram House an hralhna file chu uluk taka an zirchian hnuah sale deed an la sign pui loh thu leh a neitu thar hminga registration tih a la nih loh thu Lalduhoma hian a sawi a. Inremna thuthlung an ziahah, Mizoram sawrkarin a ram hralhna a cancel leh theih dan tarlan tel a nih avangin ram an hralh tawh chu a cancel thu leh sum an lo inhlan pawh a leitu hnenah an pek kir leh tawh thu a sawi bawk.
Ballygunge-a Mizoram sawrkar ramah hian thuneitu lamin chhawng thuma sang in sak phalna a pe tawh a, a bulhnaiah pawh chhawng sang pui pui a awm nual avangin a aia sanga sak phalna hi an dil dawn tih chief minister hian a sawi a ni.