Krismas hla sa rei record siam

Nigerian nu pakhat chuan darkar 31 teh meuh chawl lovin Krismas hla a sa char char a, Guinness World Record-in chawl lo va Krismas hla sa rei berah an puang a, hetiang record siam hmasa ber a ni bawk.
A hming chu Ewaoluwa Olatunji a ni a, Ewa Cole an ti bawk. Nikum December ni 27 aanga 28 thleng khan Krismas hla a sa char char a, niminpiah khan Guinness World Record-in a document neih ang ang te an endik hnuah record a siam tih an puang ta a ni. Hetiang record hi Guinness World Record-in vawi khat an neihna a ni nghe nghe.
Ewa hian record siam nan hian Krismas hla hrang hrang a sa kual nasa hle a, No 14, Louis Solomon Close, Heritage Apartments, Victoria Island, Lagos-ah record hi siamin, a tirah chuan darkar 24 chhung zai a tum a, mahse, a tui ta deuh a ni ang a, darkar 31 a zai ta a ni. Darkar 24 hi Guinness World Record-in record siam nana an pawm theih chin a ni.
Guinness guidelines-ah chuan Ewa hian darkar khat a zaiah minute 5 zel chawlh a nei thei a, a duh chuan a chawlh neih hi a khawl thei bawk. He minute 5 chawlh a neih chhung chiah hian ei leh in bakah zun ram thiar leh thildang tih theihna hun a nei a, a zai danah pawh phun satliah ni lo, midang hriat thama zai rik a ngai a, hla awmze nei lo sak a rem lo a, hla pangngai ngei sak tur a ni bawk.