Kristian Ni Serh Humhalhna Pun Khawm

Mizoram inthlan vote chhiar hun sawn tura Election Commission of India (ECI) ngen nan NGO Coordination Committee (NGOCC) te’n Zirtawpni hian Kristian Ni Serh Humhalhna Pun Khawm huaihawt an tum.NGOCC hi Ningani tlaiah khan an thu a, Zirtawpni-a district tina Kristian Ni Serh Humhalhna Pun Khawm huaihawt hi an rel a ni.
Vote chhiar hun tura tih December ni 3 hi Chawlhni a ni a, NGOCC chuan Chawlhni ni lo Inrinni ni lo ni danga sawn turin ECI an ngen a ni. Ziaka an ngen hnuah Thawhlehni khan ECI hotute hmaichhanah an ngen leh a, Delhi atanga Nilaini-a hawin, a tukah an thukhawm nghal a ni.
9th Mizoram Legislative Assembly inthlanpui vote chhiar (Counting Day) hun atana Election Commission of India in Ni 3, December 2023 (Pathianni) a ruat chu nasa tak leh theih ang tawka All Political Party-te, Mizo Kohhran Hruaitu Committee (MKHC) te leh All NGO Coordination Committee (NGOCC) ten dodala hma an lak hnuah leh ECI hotute pawh Delhi tlanga an zu hmuh hnuah thu lawmawm dawn leh hriattir a la awm loh avangin Ni 30.11.2023 (Ningani) tlai dar 4:00-a All NGO Coordination Committee thukhawm chuan naktuk Ni 1, December 2023 (Zirtawpni) chawhma dar 11:00 atanga chawhnu lam dar 1:00 thleng hian Raj Bhavan Hmarlam gate bulah Kristian Ni Serh Humhalhna Pun Khawm buatsaih nise an ti,” tiin Ningani tlaiah thuchhuah an siam.
“He Kristian Ni Serh Humhalhna Pun Khawm hi Mizoram puma district hrang hrangah District NGOCC hruaitute buatsaihin lo zawm ve vek ni bawk se, kan Sakhaw Ni Serh humhalh turin Mizo Kristian tawh phawt chu he hunah hian tel vek turin min sawm a ni,” an ti.
Ningani zan tir lamah khan ECI hi Delhi-ah an thu a, NGOCC ngenna an ngaihtuah em tih erawh hriat a ni lo. Zirtawpni hi an thutkhawm ni tur a ni bawk a, hetah hian Mizoram chungchang ngaihtuah a ni dawn em tih hriat a ni lo bawk.