Rev Dr Ramengliana
-- Advertisement --
Kristian tihduhdahna hi thil thar a ni lo va, a lo lan chhuah danah erawh chuan thil thar tam tak a awm thei thung. Ngaihventu tam tak rilru tihrehawmtu pakhat chu khawvel pum huapa Kristian tihduhdahna lo hluar ta zel hi a ni. Ram hrang hrangah a nasat dan inang lo mah se a tlangpui thua thlirin hemi chungchanga khawvel dinhmun hi ngaihthlak nuam tak a ni hauh lo. Ringtute tan tawngtaina tur a tam hle tih a hriat mai thin. Muang taka awm angin inhre mah ila, keini ram ngeiah pawh hian thil a danglam chakzia kan hmuh thiam a ngai a ni.
Khawvel pum dinhmun
Open Doors’ pawlin World Watch List 2025 an tihchhuahah chuan khawvel puma Kristian maktaduai 310 ten tihduhdahna hi an tuar mek a. An tawrh nasat dan erawh chu a inang vek lem lo. Khawvela Kristian 7 zela pakhat hian tihduhdahna an tuar a, Africa khawmualpuiah chuan Kristian 5 zela pakhatin tuar ang an ni thung. Kan awmna Asia ram dinhmun a la chhe zawk lehnghal a, hetah hian Kristian 5 zela 2-in tihduhdahna tuar ang kan ni. Kum 2024 chhung khan Kristian an nih avanga thihna tuar mi 4476 an ni a, Biak In leh hmunhma 7679 beih suasam an ni a, Kristian 4744 -in an rinna avangin jail bang an zut a ni. Hengte hi record hmuh theih mai an ni a, mi hriat lem lohva tuar mi tam tak an awm ang tih hriat thiam theih mai a ni bawk. North Korea hi hun eng emaw chen atang khan tihduhdahna nasat berna ram a ni tawh a, rinna avanga thihna thleng 99% hi Nigeria rama thleng a ni, an ti bawk.
Thil langsar tak pakhat chu sorkar a chak loh viau leh tualchhung indona awmna hmunah te hian he tihduhdahna hi a hluar duh bik riau a. Africa ram lama Muslim sakhua an lak runna zual hmun hrang hrangah tihduhdahna hi a nasa zual hle a. Tihduhdahna nasa zual ram 10 zinga ram 8 te chu Muslim ram an ni. Hei hi hriat thil hriat nuam lo tak a ni lo thei lo. Hetiang tihduhdahna avang hian ram tam taka kohhrante (ent., Afghanistan, Algeria) chu an inthup bo a, sorkar hriat loh turin an ‘underground’ thin a ni. China sorkar khian tunhmaa a enliam deuh mai mai an sorkara inziak lut lem lo kohhrante hnawk a ti thar riau a, a hriatpui kohhran te lah khermei taka khuahkhirhin Pastorte thu sawi dan tur thlengin thuneih khum an tum thin. Chutih laiin harsa ve tak thin Indonesia-ah te chuan tihduhdahna tla hniama hriat a ni a, ram dang tam tak pawh kawl a eng mek niin a hriat a ni.
Ram zalena tihduhdahna
Khawvel ram zalen ber pawla ngaih leh Kristiante chakna ram thin United States -a Kristian tam takten chep leh tihduhdah anga an han inngai ta tlat khu thil mak angreng tak a ni ve a. Kristian an nihna avanga tihhlum emaw, jail intantir rum rum emaw awm lem lo mah se an rinna nun chhuahpui turin an zalenna chu kiam zelin an hre ve tlat. Dik chin pawh a awm ang. Sakhaw tih bik nei lo leh sakhaw zalenna uar taka kalpui an tumna khuan Kristiante a tichep tlata hriatna a let thei tlat a ni awm e. Entirnan, mipui 50% deuhthaw hian neih inang inkawp/inneih hi pawm angin an sawi a. Chuti a nih chuan a pawm lotute leh ‘sual a ni’ tia au chhuahpuitute chu an hnawk tlat a. Chutiang bawkin nau tihtlak leh sakhaw dang zuitu pawm dan chinah te pawh a ni zel. Kristiante chu midangte zalenna kalhtu angin an hmu sakhi let zawk hial thin a ni.
Heti a nih avang hian Kristian tam tak, US khu Kristian ram anga lo pawm laklawh tawhte, chuan an ram nunna thlarau chu chan ta angah an inngai a. Tlawm zawka tang zelin Kristianna chu rah beh ni zawk hialin an hmu ta a ni. Hei hi a lo thlen chhoh dan an chhutin 1962-a sorkar schoola Bible chhiar an khap atang kha niin an hria a. Chumi hnu 1973-ah nau tihtlak sorkarin a phal leh a. Kum 1980-ah Thu sawm pek schoola tar phal loh a ni chho leh a, chu chu 1992-a kum tling loa nau paiten an nu leh pa te phalna la kher lova nau an tihtlak phalna dan an siamin a zui a. Neih inang inkawp thinte humhalhna dan 1996-a an siam leh same sex marriage (neih inang inneih) phalna dan 2003-a an neih tak te khan thil a tichhe hlein an ngai. Moody Bible Institute President thin J. Paul Nyquist chuan a Pastor-pui Erwin Lutzer-a sawi chhawnga, “The day of the casual Christianity is over,” tiin a thahnemngaihna thu a puang chhuak hial a ni.
India rama tihduhdahna
Khawvel pumpuiah pawh tihduhdah hluarna ram 10 zinga tel pha thin kha kum 2024-ah chuan 11-naah a tla thla ve hlauh mai a. Amaherawhchu, hei hi tihduhdahna tlak hniam vang lam aiin ram danga a zual vang a ni awm e. He ramah hian a nasa zual zel a ni tih chu United Christian Forum, Delhi ten hmanni lawka an thu chhuahah khan a lang chiang a ni. Kristiante laka hleilenna hi kum tinin 2014 atang khan a la pung zel a – 2014-ah 127, 2015-ah 142, 2016-ah 226, 2017-ah 248, 2018-ah 292, 2019-ah 328, 2020-ah 279, 2021-ah 505, 2022-ah 601, 2023-ah 734, 2024-ah 834. Hetianga a kal zel chuan India rama Kristiante tan hian a chhe thei viau dawn niin an hmu a ni. UCF President Michael Williams chuan Kristianten beihna an tawh chu, “a zing tual tual a, a rawng tual tual a, kalhmang a nei tha tual tual lehnghal,” a ti.
Zep thu cheng suh. Sorkar laipui BJP-in an chelh hnu hian a hluar chho zel tih a hriat a. State-a an rorelna Uttar Pradesh leh Chhatisgarh te hi hleilenna a tam zualna a ni a, zuai lam a pan duh mang si lo. Anti-Conversion Law te lah chu an uar telh telh emaw tih tur a ni. Thil pawi tak chu India ramah hian Hindu firfiak te hian Kristiante chu India mi tak tak ni ve lo deuh anga an ngai lui thin leh huatthlala anga an hmu tlat hi a ni a. Ram tana Kristiante hnathawh tha tak takte pawh Kristian nihtir tumna hmanrua ang chauhvin an ngaih luihsak thin. Kristiante chu anmahni ram ngeiah an chep ta hle a ni tih kan hre thei a. Hindutva ideology rah chhuah hi a mi tam tak tan chuan a that lohzia a lang chiang zel dawn a ni.