Kuhva tawlh man leh Lawmthu ka sawi – HM

Sakawrdai SDPO hmalakna in January 13 zan khan Darlawn daiah ram danga dan loa lakluh kuhva rah leh a phurhna truck pahnih man a ni.
Thudawn danin kuhva phurtute hian January 12 khan Champhai an chhuahsan a, Police Check gate helin Khawbung atangin Biate lamah an kal a, Sakawrdai SDPO leh a hote hian Darlawn daiah lo changin an man a ni.
Home minister K Sapdanga chuan kuhva tawlhruk titawp tura theihtawp chhuahtu police-te chungah lawmthu a sawi a. Kalphung thar hmel mipuiin an hmuh theihna turin Home department-in hma an hruai zel dawn tih sawiin, thawktute pawh an tang hle tih a sawi. “A nihna anga ‘rule of law’ hmang tur chuan kan hremna dan pawh a chak tel a ngai a, thawkthate ngaihhlutna leh thil diklo titute hremna a awm tel a ngai,” a ti.
Sawrkar kal dan tur, mipui leh sawrkar hnathawkten an hriat theihnan, sawrkar atanga ‘order’ a chhuah hma atang hauhin a theih anga tam sawi a, news leh social media lama an tichhuak chung a, dan pela kal an lo la awm chu pawi a tih thu K Sapdanga hian sawiin, “Sawrkar hnathawkte chep taka siam kan tum loa, danin a phal chhungah zalen taka hna thawk thei tura siam hi kan duh ber. Hremna lek ngai tawh lo se kan duh a, khawng takin kan kal zel dawn,” a ti.
Kar kalta khan hnamdang driver laka dan loa pawisa lak kaihhnawihah Vairengte Police check gate-a hetihlaia duty police SI leh ASI chu sawrkarin a suspend a, Vairengte Police Station OC leh constable 6 sawnchhuah nghal an ni.