Kuki zaithiam larin nunna chan

Manipur-a Zo hnahthlakte’n hlapui pakhata an neih
mek ‘I gam hilou ham’ tih phuahtuin nunna a chan tawh a, tun hnaiah Kuki zaithiam lar pakhatin a chan leh; zaithiam lar thihna hian Kangpokpi district-a Zo hnahthlakte rilru a tina tih thu dawn a ni.
September ni 12 khan Kuki zaithiam lar Bronson Ngamminlun Kipgen chu Meitei lamin an kaphlum a, Kangpokpi district-a Kuki te’n Meitei an bei let ve.
Bronson-a hi Kangpokpi district-a Lhangkichoi khaw mi a ni a, he district-a an zaithiam lar, thalaite ngaihsan hlawh tak a ni.
Manipur atanga thu dawn danin, Bronson-a hi zin kawnga kahhlum a ni a, Ireng leh Karam khaw kara motor-a an chuang lai, Meitei lamin an lo lambun (ambush) a ni.
Bronson-a bakah mi dang pahnihin nunna an chan a, a lo lambun-tute hian commando uniform an ha tih thu dawn a ni.
August ni 31 khan Churachandpur district-a an hlaphuahtu lar LS Mangboi Lhungdim (42) chu chi leh chi inbeihnaa nunna chan zingah a lo tel tawh a, hei pawh hi Zo hnahthlakte’n na an ti hle.
Lhungdim-a hian ‘I gam hilou ham’ tih hla a phuah a, ‘I ram a ni lo’m ni?’ tihna niin, Manipur-a Zo hnahthlak hrang hrangte tangrual tura fuihna hla a ni.
He hla hi tuna an buainaina a hrin chhuah a ni a, he hla hi hmun hrang hranga an infuihna, an hla pawimawh a ni.