Kum 20 dawn hnuah naupang bo chhui leh dawn

Kum 20 dawn hnuah naupang bo chhui leh dawn
German police chuan tun kar hian Portugal-ah Madeleine McCann-i bona an chhui tha leh dawn.
Kum 20 dawn liam taa a bona hmun, Algarve-a Praia da Luz khuaah tha an thawh thar leh dawn a ni.
McCann-i hi a bo lai hian kum thum chauh niin an chhungkuaa chawlh an hman laiin holiday apartment complex atangin May 3, 2007 khan a bo a ni.
Europe puma police-in an chhui tawh a, khawvela mihring bo chhui chhuah loh chanchin mak ber pakhat a tling.
German chhuitute hian kum 2020 khan Christian Brückner-a chu a bultumtu berah an lo puh tawh a. Portuguese thuneitute pawhin a nih rinna an nei.
Brückner-a hi McCann-i bo chungchangah erawh thubuai siamsak a la ni lo va, inhnamhnawihna a nei lo niin a insawi bawk a. Tunah hian Germany-ah kum 2005-a Protugal-a American khualzin kum 72 a pawngsual avangin a tang mek.
McCann-i bo chhui thar lehna tur hi kum hnih chhunga a vawi khatna tur a ni a. Kum 2023-a chhui hnuhnung berah khan an hmuh hnuhnung berna atanga minute 40 vel tlan, tuikhuah kilkhawr zelah chhui a ni.
Brückner-a hi kum 2000 leh 2017 inkar khan heng lai velah hian chengin tuikhuah bula a awm lai thlalak leh video pawh a awm.
Portuguese chanchinbute chuan chhui thar lehah hian McCann chhungkaw thlenna, Ocean Club holiday resort leh Brückner-a’n chen nana a hman thin inkar vel chhui a ni dawn tih Thawhtanni khan an tar lang.
McCann-i bo zan hian a nu leh pate chu an thiante nen an thlenna atanga hla lo teah zanriah an ei aamah leh a nau phirte chu apartment ground-floor-ah an lo awm thung.
A nu leh pa haw hian an hre mai lo va, a nu, Kate-i’n zan dar 10:00 vela an mutna a enah a awm lo tih an hre chauh a ni.
A nu leh pa chuan thla hmasa khan McCann-i bo kum 18-na an hmang a, ‘engmah hmaih awm lovin tumruh takin an zawng zel dawn’ tih an sawi.