Kum 5 chhungin thalai nuai khat tan hna siam tum

Mizoramah Congress party a sawrkar a nih chuan kum 5 chhungin thalai nuai khat tan hna siamsak hman ngei an tum tih an party vice president Lalnunmawia Chuaungo chuan a sawi.
Thawhlehnia Congress Bhavan-a MLA inthlan atana an party manifesto tlangzarhnaah MPCC vice president chuan Mizoram mai bakah India ram leh India ram pawn thlenga thalaiten hna an thawh theihna atan inzirtirna buatsaiha kawng sialsak an tum bakah Mizo thalaite tan kum 5 chhungin Young Mizo Entrepreneurship Programme hnuaiah hna nuai khat buatsaih an tum tih a sawi.
Congress party chuan mihausa leh khawsa thei sate aiin mirethei leh hnuaihnung zawkte dinchhuah chu an duh ber a, hemi atan hian ‘Tang Puihna’ kalpui an tum tih a sawi. Tang puihna chu sem policy nen a danglam tih sawiin, “Mamawh tak takte chauh tanpui an ni anga, a mamawh lote hnenah pek a ni ve dawn lo,” a ti. Hemi hnuaiah hian cheng nuai hnih thlenga puihna tur duan a ni tih a sawi.
Eirukna tihboa tun aia chak zawka Lok Ayukta thuam an tum tih Lalnunmawia Chuaungo hian a sawi a. Thuneihna sang zawk pe in, a duh huna CBI a hman theih nan thuneihna pumhlum an pe dawn tih a sawi a ni.
Lang tlang sawrkar din a, sum leh paia buai loa sawrkar hnathawkin a hun taka hlawh an lak leh theihte chu an ngaipawimawh em em tih a sawi a. Zirna, infiamna leh health care system-ah kalphung tha leh rintlak zawk an duan dan te a sawi bawk.