Kum li chhung inkhel thei lo tur Pogba!
Damdawi hman khap zinga mi testosterone a lo hmang tih manchhuah a nih hnuah nikum September thla atang khan France leh Juventus midfielder Paul Pogba chu ‘suspend’ lai-lawk a ni a, a chungchang thu ngaihtuah a nih hnuah kum li chhung inkhel thei lo tura hremna pek niin, a chunga rorelna tla hi a khinlet ngei tur thu French-man hian a sawi.
Pogba chunga hremna tla chungchang hi Ningani khan Italian media-te chuan puangin, Sky Sport Italy leh La Repubblica tarlan danin anti-doping prosecutor’s office chuan kum li chhung hremna pe turin a ngen hlawhtling niin an tarlang.
Tarlan tak angin, nikum khan Italy national anti-doping (NADO Italia) tribunal chuan testosterone avang hian inkhel thei lo turin lo phuar tawh a; nikum October thlaah sample pahnihna endik leh niin, tah pawh chuan damdawi khap zinga mi hi a hmang ngei tih nemngheh a ni.
Test hi Juve-in France and Juventus midfielder Paul Pogba season kal lai bul an tanna inkhela sithum faia mualneitu Udinese an hneh tum nikum August ni 20-a kalpui niin, khami tum khan Pogba sample-ah chuan infiammite thahrui tifel thei damdawi hi hmuhchhuah niin, kha game-ah khan kum 30 mi Pogba chu substitute bench lamah thu tluan mah se dan anga doping test a hmachhawnah testosterone an manchhuak ta tho a ni.
Juventus lam chuan he thu buatsaih lai thleng hian an midfielder hremna chungchangah engmah an la sawichhuak lo a, mahse, media-te thu lakna chuan kum li chhung hremna chungchangah club lamin thuchhuah an siam thuai dawn a, anni lamin chet an lak ve dan tur pawh an tichiang thuai dawn a ni.
Frenchman hian kum 2022 khan Manchester United chhuahsanin a club hlui Juventus hi free transfer-in a zawm leh a, Turin club-a a luh vawihnihnaah hian a tluang lo viau mai a, hliamin a tihbuai deuh reng karah buaina lian lutuk maiin a tlakbuak zui ta a ni.
2018 World Cup winner Pogba hian khup leh kheimit hliam avangin season liamta khan a club vawn lai tan khelmual a lut mang bar lo a, France tan pawh Qatar ram World Cup-ah khan a inlan thei lo.
Pogba hian a chunga rorelna chu dik lo tia sawisel-in, infiamna zawna thuchhe remna sang ber Court of Arbitration for Sport lama a zualko tur thu a sawi.
United player hlui chuan, “Professional athlete ka nih angin damdawi hman phal loh hmanga intihchak hi ka tih ngai loh a ni a, infiammi dangte leh ka khelhna team supporter-te kalh zawng, zah lo tak leh bum zawngin ka khawsa ngai hek lo,” a ti.
Thutlukna tak tak puan hmaa suspend hma-saah khan Pogba agent, Rafaela Pimenta chuan Paul Pogba chu dan bawh-chhe ngai lo a nih thu a lo sawichhuak tawh a, mah-se, vawihnih endikah dan phal loh damdawi an hmu miau a, football chanchina hremna na ber pawl pek a ni zui ta a ni.
Hremna hi a nih ang anga a tuarchhuak a nih chuan Pogba hian kum 2027 August thlaah inelna a hmachhawn tan leh thei chauh dawn a, tah chuan kum 34 a lo tling dawrh tawh dawn a, hralh a tla vak tawh lo mai thei!
Pogba hian Juventus-ah kum khat chhungin pound maktaduai 6.9 a hlawh mek a, tunah hian engtin chiah nge an player chungah chet an lak dawn tih puanzar la ni lo mah se club-te leh players’ union lam inremna angin hrem a nih chhung hian ban loin a hlawh hi thlakhata £2,000 vel la tur angin an tihniam mai thei a, June 2026 thleng awh tur contract an lo ziahpui tawh kha an titawp mai thei bawk.
NADO-in Pogba hremna hi an lo suspend lailawk tawh atanga chhiar tanin nikum August ni 20 atangin hremna an chhiar tan a, Juventus-a a contract tawp hma kum khat la awmah a inkhel leh thei chauh dawn a, mahse, chumi thleng thleng chu Turin club hian an nghah a rinawm chiah lo!
Kum li chhung inkhel thei lo tur Pogba!
Get real time updates directly on you device, subscribe now.
Prev Post
Next Post