Kum li hnua last 8 lut Barca

Kum li hnua last 8 lut Barca
Napoli hnehin kum li chhunga a vawikhatna atan Barcelona chuan Champions League quarter-final an lut a; Fermin Lopez chu kum 2018-a goal khungtu Ousmane Dembele hnu lama Barca player zinga Champions League knockout stage-a goal thun thei naupang ber a ni.
Team pahnih hi Italy ram first leg-ah sikhat ve ve thuna inhnehtawkin, Thawhlehni zan last 16 second leg-ah 3-1-in Catalan team an chak a, vawihnih inkhelh belhkhawmah La Liga club hi 4-2-in an tlang ta zawk a ni.
Napoli hian vawinga an hmachhawn tawhah Barca hi an la hneh ngai miah lo a; tarlan tak ang khan, 2020 Champions League-a an result ang chiahin tun season-ah pawh Naples khuaah 1-1 draw an hlawhchhuak a, Nou Camp lamah 1-3-in an tlawm zui leh ta a ni.
Thawhlehni zan inkhelah kum 20-a upa midfielder Lopez chuan minute 15-ah Barca hmahruaina goal khungin, minute hnih hnu lekah Joao Cancelo chuan sihnih faia mualneitu team hmahruaina a thawh ve leh a; darkar chanve an khel tling tihah Kosovan centre-back Amir Rrahmani chuan Serie A club beiseina siamsakin an siphurh pakhat sut then bawk mah se minute 83-a Poland striker Robert Lewandowski goal chuan Italian club beiseina a titawp zui ta a ni.
Barcelona boss Xavi Hernandez khan player naupang zawk leh tawnhriat nei tawh inpawlh mawi tawk team a chhawr a, an club hmalam hun zel tur thlir chungin young talent rual a kawlte chu Europe inkhel lianah khelhna hmun a siamsak a, tun thleng chuan a la tisual lo niin a lang.
Player naupang zawk laka rinna a nghah zinga mi Lopez kha season liamta mai khan third-tier Linares lamah season khat chhung loan-a chhuahtir a ni a, Barca first team luah tura hruaikir a nih hnuah nikum favang lai khan Clasico inkhel ropuia Real Madrid an tum tumin first eleven chantir a ni a, 2023-24 chhungin senior team tan game 30 a khel tling der tawh!
Napoli game kha a career-a inkhel lian a la nih hmel a; nung takin bul a tan a, goal hmahruai a khung hma khan a hun tha neih bawhpelhin Napoli crossbar chungah a thawnchhuak.
Player naupang zawk tana hmun a siamsak rualin Xavi khan experienced midfield pair Roberto leh Oriol Romeu a chhawr a; chutih laiin Barcelona youngest gun Lamine Yamal hmuh tur a la awm bawk.
First leg-a khelmual a luh rualin Yamal kha Champions League knockout game khel thei naupang ber a ni a, second leg-ah knock out match-a goal khungtu naupang ber nih theihna hun remchang nei leh mah se hnai set sawt atanga a goal tihluh chu offside vangin pawmsak a ni lo.
Montjuic Stadium inkhel boruak kha a sang hle a, team pahnih ball chan zat pawh a intluktawk hle laiin Italian champion khan chhetein ball an chang tam hlek zawk.
Napoli hian season chhia an vaikiang zo lo tluang zel a, Champions League lamah nikuma an thlen chin quarter-final lut zo loin an tla fel a; Serie A lamah ni se pasarihna daih niin, point 28 ngawtin hmahruaitu team nen an inthlau tawh a; season kal laia an manager pathumna ni tawh Francesco Calzona pawhin team a chawikang zo lo!
Champions League draw hi naktuk, Zirtawpni zana tihfel tur a ni.