Kum tling lo pawngsual, a tam hle…

Mizorama sualna record tam ber chu rukruk case a ni a, kum tling lo pawngsual (POCSO Act) bawhchhiatna pawh a tam hle nia tarlan a ni.
Hei hi nimina Chief minister hova Mizoram Security Coordination Committee thutkhawm chungchang sawrkar thuchhuahin a tarlan dan a ni. Hei bakah hian nikum 2024 chhunga ND&PS Act hnuaia case 338 registered a nih thu te, kumin May thla thlenga case 114 ziah luh a nih thu te, kumin May thla thlenga methamphetamine tablet kg 648.824 man a nih thu leh Rs. 84 Cr. hu vel nia chhut a nih thu te, Crystal Meth Kg 5.169, Rs. 15.5 Cr hu vel man a nih tawh thu te, nikum 2024 chhunga ralthuam leh puak thei case 47 ziah luha mi 56 man a nih thu te, kuminah May thla thlenga case 34 register tawh niin mi 51 man a nih tawh thute pawh chipchiar takin tarlan a ni bawk.
Ruihhlo heng —Meth, Crystal Meth, ralthuam puakthei thil etc. te hi Mizoram pawn atanga Mizoram chhunga lo lut a ni a, man chhuah a nih dan chipchiar takin tarlan a ni. Chutih laiin, Mizoram khua leh tui, Mizoram chhunga chhiatna thlentu rukhmang leh kumtlinglo pawngsual thinte chungchang erawh chipchiar taka tarlan a ni ve lova, record/data mumal a awm loh vang te chu a ni em lo ang a, tarlan nuam an ti zan lo te pawh a ni ang e.
Mahse, Mizoram hi hursualna kawngah kan dinhmun hi a tha lo hle tih chu kum engemaw ti zat kal ta atanga tarlan thin a ni. POCSO Act, 2012 (Protection of Children from Sexual Offences Act, 2012) a lo pian hnuah, a kaihhnawih department lamin hma an han la a, public awareness campaign te ngawrh taka neih a nih hnuah, Mizoramah kumtlinglo pawngsual case chu a rawn pung ta hluai mai a. Hei hi hi a chhan nia lang ta chu, tunhmaa kumtlinglo pawngsual thleng thinah, a titute leh a tuartute inlamhnai tak an lo nih thin avangin, court thubuaia la lova insawi rem mai a ni thin a, kha kha kalsanin, POCSO avang hian dan anga kalpui duhna a lo lian ta nia ngaih a ni.
Kan dinhmun dik tak (data) tarlan kan duh lo a nih pawhin, ‘a tam hle’ a nih chuan, he lamah hian kohhran leh pawl hrang hrang YMA, MHIP, MUP leh zirlai pawlte intelkhawmna hnuaiah engtin emaw taka hma lak hi chu tih makmawh a ni. ‘A tam hle nia tarlan a ni’ tih ringawtah duhtawk mai lo ila, inralrinna dar (red alert) hi kan khawn rik a tul takzet a ni.