Kumin Remna Ni ah MZP-in chawimawi tur a nei dawn lo

Kumin Remna Ni ah MZP-in
chawimawi tur a nei dawn lo
Covid len lai kum hnih chhunga neih theih loh, Remna Ni chu Mizo Zirlai Pawl chuan kuminah a hmang leh dawn a. Kum 5 chhung he Ni hmannaa remna atana thawhhlawkte chawimawi an hlan thin chu kuminah chawimawi tur an nei lo.
MZP Gen. Hqrs. hruaitute sawi danin, June 30 hian Mizoram-in remna leh muanna kan neih champha vawi 39-na, ‘Remna Ni 2025’ lawm turin an inbuatsaih mek tih an sawi a. Remna Ni hi Mizo mipui tana hun pawimawh em em, lungrual taka lawm ho tur ni mah se, a bikin political party-te ngaihdan a inang lo fo tih an sawi.
“Remna Ni-ah kan inhnial nasa thin hle a. Hun pawh kan hmang ho hlei thei lo a ni ber. Chuvangin MZP chuan hei hi a vei hle a, political party awn lam nei lo zirlai pawl chuan kum 2018 atangin kumtin Remna Ni hi a buatsaih ta ziah mai a ni,” MZP president H Lalthianghlima chuan a ti.
MZP buatsaihna hnuaiah political party hrang hrang pawhin lungrual takin hun an hmang ho thei ta zel a. A hun laia sawrkarna fawng chelhtu apiang an inti neitu lo thei lo, tiin, MZP chuan lawmawm a ti a. Hun lokal zelah pawh Remna Ni hi Mizo mipuiin lungrual takin hmang ho zel thei ila tih chu an duhthusam a ni tih a sawi bawk.
MZP hian Remna Ni-ah remna atana thawhhlawk mi hrang hrang a lo chawimawi tawh tih a sawi a. Kum 2018-ah Lal Thanhawla, Laldenga, Lalkhama (IAS Retd), 2019-ah Rev Dr HS Luaia, Rev Dr Zairema, Rev Dr Lalngurauva Ralte leh Lalduhoma, 2022-ah Rev Dr Lalsawma, 2023-ah Mizoram Kohhran Hruaitute Committee, 2024-ah JH Rothuama, P Lalupa, Lalthanzauva leh Ngurchhina an ni a. Kuminah erawh chawimawina a pe chhuak dawn rih loa, hun lokal zel turah chuan la sem zel tum a ni tih MZP hruaitute chuan an sawi.
Kuminah hian Aizawl Lammualah hman a ni leh dawn a, chief minister Lalduhoma chu khuallian tura beisei a ni. School hrang hrangin cheraw kanin, zai leh lam leh thusawi bakah lemchan en leh ngaihthlak tur a awm dawn a. MZP chuan Mizo mipui zawng zawng he hun hmang tura sawmin, sawrkar mi pawimawh, NGO hrang hrang, kohhran hrang hrang, zirna in zawng zawng leh politicial party tinte tel turin an sawm tih an sawi a ni.
‘Remna kan neih hi kum 39 ral tawh mah se, a hlutna a la ngai reng a, kum 20 tehmeuh hreawm leh harsa taka Mizo mipui kan awm hnu ah, Mizo mipui tawngtai chhuah a nih avangin, theih ang tawka lawm hi a phu a. Zirlaite phei chu a hlut zia leh Mizo hun pawimawh a nih zia kan inhrilh thar zel a tul a ni,’ MZP chuan a ti.