Kuminah Kolasib-ah HIV kai 86 hmu thar

Kuminah Kolasib-ah
HIV kai 86 hmu thar
HIV kai leh kai loh endiknaah rai puar leh a bak zawng (general) chu ziah hran thin a ni a, kuminah Kolasib district-ah HIV kai 86 hmuh tawh niin, heng zinga 11 hi nu nau pai mek an ni.
Mizoram State AIDS Control Society (MSACS) leh District AIDS Prevention & Control Committee (DAPCC) Kolasib District tangdun huaihawtin Inrinni zing khan Kolasib Venglai Bazar bul, YMA Park-ah World AIDS Day 2023 pualin hun hman a ni.
He hun hmanpuitu Kolasib district senior chief medical officer Dr RK Lalthlamuana chuan HIV kai tamna leh invenna kawnga hriat tur a sawi a. HIV hrik inthlah pung tur leh midang kaichhawng tur venna leh AIDS veina laka chhan thei, Anti-Retroviral Therapy (ART) lak theih dan lak a pawimawhna a sawi a ni.
Kolasib District CMO office data-a a lan danin, kumin April atanga October chhungin an district-ah HIV an kai leh kai loh enfiah nana thisen test (general) 3435 atangin HIV kai hmuh 75 an awm a; raipuar thisen test 1195 atangin HIV kai 11 hmuh an ni. Kolasib district-ah ICTC (Integrated Counselling & Testing Centre) thisen test-na hmun 3 awmin, FICTC (Facility-Integrated Counselling & Testing Centre) 6 a awm a ni.
Kolasib district-ah hian ART awm tirh atangin PLHIV (People Living with HIV/AIDS) inziaklut 1630 awm tawhin, mi 298 chuan nunna an chan tawh a. October 2023 report-a PLHIV in-register 1255 zinga 1245 chuan ART an ei mek.
Kolasib district-a damdawia inchiu thin (injecting drug user) chhinchhiah 1293 zingah HIV kai 387 awmin, hmeichhe inzuar (female sex worker) chhinchhiah 153 zingah HIV kai 16 an awm. Mipa leh mipa inpawl thin chhinchhiah 25 zinga 5 chu HIV kai an ni.
Kolasib district-ah OST Centre pahnih – Kolasib leh Vairengte leh Satellite OST 5 – Hortoki, Kawnpui, Lungdai, Bilkhawthlir leh Saiphai a awm a. Heng centre-ah hian OST client 261 an awm mek.