Kuminah meth man hnem tawh

Ruihhlo hlauhawm meth man tur a awm leh thin a, kuminah pawh excise force te’n an man leh nual tawh; nikuma an man zat nena khaikhin chuan kumin thla hnih chhunga an man zat hi a tam tham viau mai.
Mizoram Excise & Narcotics (MEN) department-in an chhinchhiah danin, kuminah January leh February-ah khan meth hi kg 96.485 an man.
Nikum khan kum tluanin kg 99.506 an man a, kuminah thla hnih chhungin nikum kum tluana an man zat an man tling thuak. 2022-ah khan meth hi kg 115.007 an man a, chumi nena khaikhinin kumin thla hnih chhunga an man hi a tam.
‘Meth’ tia sawi methamphetamine hi Mizoramah man tur a awm thin na a, he ruihhlo lakah hian Mizoram a la himah ngaih chu a la ni. Mizorama an man pawh hi Mizoram pawn hmun danga mi tur a lo ni thin tih thu dawn a ni.
Meth hi khawchhak lam atangin khawthlang lam hmun hrang hrangah an la a, Mizoram hi a kawng a nih avangin man tur pawh a awm thin tih chu MEN hotute sawi dan a ni.
2020 leh 2021-ah khan an man tam lo a, meth hi man tur a tam lo nia ngaih a ni. 2020-ah kg 45.547 an man a, 2021-ah kg 12.268 an man. 2019-ah khan kg 146.129 an man a, hei hi 2019 atanga 2023 thlenga an man tam ber kum a la ni.