Kuminah ruah a sur ta

Nikum khan Mizoramah ruah a sur har a, kuminah chuan January-ah a sur. Tam tham phei chu a ni lo.
January ni 24 zan khan ruah a sur a, tlemte phei zawng a ni. State Meteorological Centre-in an chhinchhiah danin, January ni 24-a ruah tla hi mm 1.8 a ni.
Mizoram hi ruah tui tamna a ni a, kum khat chhungin ruah hi thla tin a sur thin tiin a sawi theih. Nikum khan January leh February-ah a sur lo a, March ni 16-ah kum khat chhunga ruah hmasa ber Mizoramin a dawng chauh.
Nikuma ruah sur har khan ken tel a nei a, lui tuite pawh a tlem hman. Ruah sur hnua nipui a lo thlenin a hrehawm chiin khua a lum a, temperature a sang lutuk lo a nih pawhin khua a lum uap hle. Mizoram Pollution Control Board lam chuan kum thar lawmna halpuah hal a nasa a, ruah a sur har ta si a, halpuah khu boruaka zamin lei a tuam ta a, sipaulin hnuaia awm ang deuh kan ni tiin an chhut. 2024 kum thar lawm nan kuminah nasa takin halpuah hal a ni leh a, khawchin ngaihvente’n ruah a sur har ang tih hlauh rukna an nei.
Kuminah ruah a sur tawh na a, ruah hmasa ber hi a tam lo, tih tham a ni lo. Nikuma March ni 16-a ruah hmasa ber a sur khan mm 19.4 a tling a, kuminah chuan mm 1.8 chauh a ni. Mahse teh tham chu a tling.
State Meteorological Centre lam chuan tun ruah a beiseiawm zui vak rih loh thu an sawi a, Regional Meteorological Centre atanga thlirlawkna an dawnah chuan kar leh Thawhlehni atanga Ningani thleng hian Mizoram hmun tlemteah ruah tlem sur tura rin a ni tih a nih thu an sawi.