Kuminah rul chuk 198 awm Fur laiin fimkhur turin chah

Kuminah Mizoramah rul chuk hriat theih chin chu 198 an ni tawh a, heng zinga 142 chuan rul tur thahna la in damdawi in an pan a ni.
Health department hnuaia National Programme for Prevention and Control of Snakebite Envenoming (NPSE) Mizoram-in mipui a hriattirnaah fur laiin rulchuk case a tam thin a, rul chuk theihna laka inven fimkhur a pawimawh hle, tiin, rul chuk case hi zan lamah a tam thin avangin zana pawn chhuahnaah torch light eng tha tak nen fimkhur taka kal thin turin an chah.
In bul, huan leh ram lama hna thawk thinten kut leh ke khuh kim thei thuamhnaw – kekawr, ngalzem leh kawr bantluan, pheikhawk rawng sang leh kutkawr hmang uar turin an chah a. Rul chuk laka him theih nan, in/ lo leh huan thlam bul vel fai taka enkawl a; rulin a ei thin sazu-ten rul a koh hnaih thin avangin heng hmunah hian sazu an awm loh nana hma la turin an chah bawk.
Zan mutnaa thosilen zar a, phui taka bilh lut turin an chah a. Rul tam ber chu tur nei an nih vek lem loh rualin, eng rul pawhin mi a chukin phili buai loa, zawimuanga rul atang inthiar fihlim a, rulin a chuk chu thlamuan/ hnem a pawimawh tih an sawi.
Rul chuk hmuamhma hnaiha inbel pheikhawk, ngun, zungbun, kawnghren, sana leh thuamhnaw phelh thawlin, ngaihthah mai loa a rang thei ang bera damdawi in biakpawha pan thuai a tul tih an sawi a ni.
Rul chukna hmuamhma khawih danglam loa, a chukna hmun tawn khalh, zai belha thisen sawr, rul tur fawh chhuah tum leh ramhmul damdawi (traditional practices) hmang loin, a hmuamhma che tam lo tura them dawh chungin, rulin a chuk chu veilam delha mut tir chungin damdawi in pan thuai a him ber tih an sawi bawk.
‘Mi chuktu chu eng rul nge tih hriat hian a enkawl kawngah thui tak kawngro a sut avangin, a theih chuan a chuktu pianphung chhinchhiah emaw thlalak kawl that nise,’ an ti.
Mizoram sawrkar damdawi in – District Hospital atanga Primary Health Centre chin thlengin rul tur thahna – antisnake venom dah a nih tawh thu leh sawrkar damdawi inah thawk doctor-te hnenah ruk chuk enkawl kawnga an hriat tur hrilhhriat an ni tawh thu an sawi a. Integrated Health Information Platform report-a a lan danin, kumin hian Mizoramah rul chuk 198 report an dawng tawh a, heng zinga enkawl ngai leh damdawi in pan mi 142 zinga 135 (95%) chu sawrkar damdawi ina enkawl an ni.