KVK scientist leh tomato ching hlawhtling hnenah IIHR award

Institute of Horticultural Research (IIHR) Bangalore chuan KVK Khawzawl head Dr Malsawmkimi chu ‘Award of Excellence for Promotion and Spread of ICAR- IIHR Technologies’ a pe a. Award hi ICAR New Delhi deputy director general (Horti Science) Prof. Sanjay Kumar Singh chuan Thawhlehni khan a hlan. Rabung khua ami NB Sanga Chhangte chu ‘Best Farmer Award’ pek a ni bawk.
Senior scientist Dr Malsawmkimi hi IIHR technology-te kuthnathawktute hnena hlanchhawn kawngah a thawh that avangin chawimawina hi hlan a ni a. A kaihhruaina hnuaiah KVK Khawzawl hian Mizoramin fur laia tomato a chin ve theih loh chhan an zirchiang tawh. Kum 2015 khan on farm trial-ah “Introduction of Triple Resistance Variety Arka Rakshak” chu hlawhtling takin Tuipui khuaa Vanlalmuana huanah a enchhin pui a, natna leh rannung laka thlai ven dan a zirtir bawk.
Kum 2018 khan Tualteah Arka Abhed leh Samrat chu IIHR atang la chhoin, thalai kuthnathawktute a kaihruai hmasa a, hei hian midang a tih hmuh chho zel a ni. KVK Khawzawl hian IIHR variety tomato bakah dawnfawh variety – Arka Shyam& Arka Muthu, bean variety – Arka Anoop & Arka Suvidha leh long bean Arka Mangala, bawkbawn variety – Arka Harshita pawh hlawhtling takin kuthnathawktute lo/ huanah a lo enchhin pui tawh. Mizoramah a thawktu lam zingah IIHR award dawng hmasa ber a ni.
IIHR-in ‘Best Farmer Award’ a hlan NB Sanga Chhangte hi KVK Khawzawlin a dilsak a ni a. Kum 2017 atang khan tomato Arka Samrat ching tanin, KVK scientist-ten an zirtir a. Rabungah hian a ching hmasa ber niin, tunah tomato ching hi Rabungah in 40 vel an awm mek. Kum 2023 khan tomato atangin NB Sanga hian cheng nuai 8 a lei chhuak a, a hlawhtlinna kawngah sawrkar department dang – District Rural Development Office leh Horticulture pawhin an ngaihsak hle a ni.
Best Farmer Award hi Tualte khaw mi TC Lalliantluanga leh Lalsangzuala te chuan KVK Khawzawl kaltlangin IIHR atang hian an lo dawng tawh bawk.