L.K. Advani hnenah ‘Bharat Ratna’ pe

Deputy Prime Minister hlui L.K. Advani, Ram Rath Yatra sulsutu leh Ram Temple movement ram chhunga kalpuitu ber chu India chawimawina sang ber Bharat Ratna dawng tura thlan a ni. Ayodhya-a Ram Temple hawn a nih hnu ni sawmah he chawimawina sang hi pek a ni a, kum 2015 khan India chawimawina sang ber dawttu Padma Vibhushan pek a lo ni tawh bawk.
“Kan tunlaia hruaitu zahkai ber zinga mi a ni a, India tana a thawh te chhinchhiahtlak a ni. Grassroot level atanga tanin kan ram Deputy Prime Minister ni thei a ni” tiin Prime Minister Narendra Modi chuan a sawi.
Advani pawhin thuchhuah siamin chawimawina a dawn chu hlu a tih thu sawiin ama mimal chauh ni lovin ‘ideals leh principles’ vang pawhin a ti a.
“Kum 14 mi lek nia Rashtriya Swayamsewak Sangh (RSS) ka zawm atang khan thil pakhatah chiah lawmman ka phut thin chu chu mahni inphata ka hmangaih ka ram tana thawh hi a ni” tia sawiin motto pakhat ‘He hun hi ka ta a ni lo’ tih chuan a kaihhruai thu a sawi bawk a. Jan Singh leader Deendayal Upadhyay te, Prime Miister hlui Atal Behari Vajpayee leh a nupui thi tawh Kamala te a hriatchhuah thu a sawi bawk.
Kum 1990 a Ram Nath Yatra a kalpui chuan India sawi danglamin Babri mosque dinna a temple sak tumna lian em em in kum 1992 khan mosque chu chhutchhiahin a awm zui a, India politics chu a sawi danglam chiang hle bawk.
BJP te chu national politics-ah pawimawh takah hlangkaiin kum 1996 khan ni 13 an sorkar phah hial a, kum 1998 khan thla sawm pathum an sorkar leh a, kum 1999 leh 2004 khan kum nga an sorkar thei ta bawk a ni.
BJP kaihhruai NDA sorkarah 1998-2004 khan Union Home Minister niin kum 2002-2004 khan Vajpayee hnuaiah Deputy Prime Minister a ni a. UPA era Manmohan Singh kaihhruaiah khan Leader of Opposition a ni bawk.
Kum 2004 a Vajpayee sorkar a tlak khan RSS leh BJP te inkarna a chhe hle a. Adavani chuan poitcal hawk atanga broad-based leader zawk nih tumin June 2005 khan Pakistan-ah ni ruk thangin a zing zui a. Mahse, Pakistan founder Mohammad Ali Jinnah chu secular tia a sawi avangin Sangh Parivar te ngaihdan a ni lo hle a, Sangh Parivar te chuan India inthen hrannaah Jinnah chu sulsutu berah an ngaih vang a ni. Advani chuan BJP president nihna a bansan phah a ni.
Mahse RSS te nen inbe tha lehin kum 2009 khan BJP prime ministerial candidate a ni bawk. Amah thlak turah RSS leh BJP te inkarah inhnialna a awm hnuah kum 2013 khan Modi chu thlan a ni ta a ni.Modi sorkar pian hnuah Padma Vibhushan pek a ni a, tunah Bharat Ratna pek a ni leh ta a ni.