La Liga hmahruaitu Real

Tun season-ah Real Madrid hian top flight-ah elpuitu thar an nei ta tlat a, chu chu Barcelona ni loin Girona an ni! He club tenau ve tak nen hian La Liga table-ah hma an inhruai-chhawk zak zak a, Ningani zana hnehna changin Carlo Ancelotti team hian a ler an luah chho ve leh ta rih a ni.
Santiago Bernabeu club hian Getafe mualah sihnih faiin hnehna an chang a; Real chakna goal hnih hi Joselu tihluh ve ve niin, a goal hmasa zawk hi minute 14-a Lucas Vazquez siamsak hmanga a thun a ni a; second half tir lam minute 56-ah Stoke striker hlui bawk hian a goal hnihna leh sihnih faia mikhual team chakna goal a khung leh a, he goal hi Vinicius Junior chhawpsak atanga a thun niin, season kal laiah Joselu hian goal sarih a khawl tling ta a ni.
Mualneitu team lam tan Mason Greenwood leh Borja Mayoral-te’n goal thun theihna hun remchang hmu mah se goal ban a petper ve ve a; Real Madrid-in an sihnih thun hum tluanin point thum an thawkchhuak a, league khelh 22-a point 57 neiin table-ah a sang ber an luah chho a; pahnihnaa chhuk leh ta rih Girona nen point hnihin an inthlau.
An kawtkaia chak zo lo Getafe-in table-ah 10-na an luah chhunzawm ve thung.
Madrid hian Getafe mualah hremna tuar zo hlim Jude Bellingham chhawr leh tan thei mah se goal a khung zo ta rih lo a, Getafe goalkeeper David Soria veltu chu Joselu zawk a ni rih.
Real Madrid hian nak-tuk, Pathianni zan derby game dangah table-a pa-thumna luahtu Atletico Madrid an su zui leh ang.