LADC-a MNF MDC 7 an bang

Lai Autonomous District Council-a MNF Legislature Party chhunga thuneihna inchuhna kalzelah Thawhtanni khan MNF MDC 7 chuan MNF party atanga banna an thehlut.
Thudawn danin, MNF MDC pasarih bang te hi – Manghmunga Chinzah, T Lalengmuana, V Zathanga, BN Thangpuia, Tuturu Singh, L Lalhmachhuana leh CL Lianzuala te an ni a; MNF District Hqrs Lawngtlai president hnenah banna hi an thehlut a ni.
LADC-a MNF Legislature Party chhungkaw buaina vangin MNF Legislature Party-a MNF MDC leh BJP, INC, ZPM leh independent member an vaiin MDC 13 chuan ehief executive member chuan thlawptu a ngah tawk lo tih larsapah an thlen a ni. CEM nilai V Zirsanga chuan floor test neih hmain CEM atangin banna a thehlut a, MDC 13 intelkhawm zinga pakhat chu lehlamah pakaiin, elected member 24 awm mekna LADC-ah tumah sawrkarna siam thei awm loin, member 12 ve ve an awm a ni. Larsap chuan LADC thuneihna laksakin thla 6 chhung tan LADC enkawl lailawk turin Lawngtlai DC chu a dah.
LADC-ah hian elected member 25 awmin Assembly inthlanpui neihah khan Chandmary bialtu MDC Dr Lorrain Lalpekliana Chinzah chu Lawngtlai East bialah MLA atan thlantlin a ni a, Dr Lorrain hian MDC a nihna a bansan tawh vangin tun dinhmunah LADC-ah hian elected member 24 an awm mek.