LADC-a sawrkar siam turin pawm

Lai Autonomous District Council-a Congress leh MNF tangdunin sawrkar an siam theih thu Mizoram larsap hnena an thlen chu larsap hian a pawm a, chief executive member atan South Lungpher bialtu MDC C Lalmuanthanga rawt a nihna pawh a pawm a ni.
Ningani khan larsap hian LADC-a sawrkar siam thei nia insawiten CEM atana an rawt hi a pawm tih hriattirna a tichhuak a ni.
Tarlan tawh angin, LADC-a MNF Legislature Party V Zirsanga kaihhruai sawrkar chu anmahni lamtang lo lam MDC 13-in larsap hnenah thlawptu a ngah tawk lo tih an thlen a. Larsap hian fiah a, floor test nei tura a tih laiin, CEM V Zirsanga hian a nihna atangin banna a thehlut. LADC-ah sawrkar mumal a din theih loh avangin larsap hian caretaker atan Lawngtlai bawrhsap a ruat a ni.
Congress MDC 1 leh MNF MDC 12 chuan United Legislature Party dinin sawrkarna an siam theih thu larsap hnenah hian kumin May 1 khan an thlen a. Congress member awmchhun C Lalmuanthanga hi CEM tura rawt niin, hei hi larsap chuan a pawmsak a ni.
Thudawn danin, hun remchang hmasa berah chief executive member thar tur hi Lawngtlai district bawrhsap-in rinawmna thu tiamtirin a lalut anga, larsap ruahman lawk angin CEM thar rintawkna hi May 20 khian LADC Session-ah neih a ni ang.