LADC inthlanpui atan party pathumin candidate an puang

On Nov 13, 2025 2 0

LADC inthlanpui atan party
pathumin candidate an puang
Lai Autonomous District Council 12-na member inthlanpui neih turah political party pathumin Nilaini khan candidate an puang a. An zingah hian Zoram Peoples’ Movement party chiahin bial awm zawng zawng, bial 25-a an candidate tur an puang nghal.
Mizo National Front chuan MDC bial 25-a bial 20-ah candidate tur an puang a; Indian National Congress-in bial 10-a an candidate tur an puang ve bawk.
ZPM president Lalliansawta chuan an candidate tur hi an party office-ah a puang a. Candidate thlang tur hian a hmuna awmte atangin mi 8 awmna Search Committee an din a, kum tir atang khan candidate atana tha tur zirin ngaihtuahna an lo seng tawh tih a sawi. “ZPM Gen. Hqrs chuan Nomination Committee dinin tum 5 kan thu a, uluk taka kan ngaihtuah hnuah secret ballot hmangin heng mi 25 hi kan thlang chhuak a ni. LADC-a bial 25-ah hian din tum leh inbeisei mi 116 an awm a, bial pakhatah mi pakhat chauh zel thlan a ngaih avangin bial chang ve ta lo an awm lo thei loa, kan vaiin Lai mipui leh ZPM tan tang tlang turin kan insawm a ni,” a ti.
ZPM candidate zingah Paithar bialtu MDC ni lai, ZPM sawrkara chief executive member ni tawh V Zirsanga’n seat a chang loa, Cheural leh Bungtlang South bialah pawh ZPM MDC nilai hnawl an ni. ZPM hian an MDC nilai 6 chu an bial ngaia ding turin an ti thung.
MNF president Zoramthanga pawhin Mizo Hnam Run-ah MNF Nomination Committee-in an party official candidate atan a ruat a puang a. A vaia bial 25 awmah bial 20-a an candidate tur a puang. An puang vek nghal loh chhan chu, MDC bial 5-a an party aiawha ding turah thuthlukna tawp an la siam thei rih lo tih MNF party hruaitute chuan an sawi a ni.
MNF hian an MDC nilai 11 chu an bial ngai theuhah an din nawn tir dawn a; ruat MDC Lalthanmawia Colney chu Lawngtlai AOC biala ding tura tih a ni.
INC chuan Lawngtlaiah Nilaini khan an candidate tur hi MPCC vice president C Ngunlianchunga’n a puang a. Lai District Congress Committee Political Affairs Committee kutah candidate ruat hna hi dah a ni. Tun tum hi a thawh khatna niin bial 10-a an candidate tur an puang phawt tih an sawi a ni. INC hian an MDC neih chhun, CEM pawh lo ni tawh C Lalmuanthanga chu a bial ngai South Lungpher-a ding turin an dah leh a ni.