Lake Tahoe-a lawng chesualah mi paruk thi

Lake Tahoe-a lawng chesualah mi paruk thi
US-a California leh Nevada inrina, khualzinten an tlawh nasat em em, Lake Tahoe-a lawngleng letah mi paruk an thi.
Inrinni chawhnu (India-a Pathianni chawhma) lama thil thlengah hian mi pahnih chin hriat lohvin an la awm mek a, thli na takin a nuai hnuah tui fawn metre 2.5 vela sang insiamin an let a ni.
El Dorado County Sheriff’s Office chuan mi pahnih damin tui atangin an la chhuak a, damdawi inah hliam tenau leh hypothermia avangin enkawl mek an ni tih a puang.
US Coast Guard chuan feet 27-a sei Chris-craft lawngleng hi darkar khata km 56-a chak thliin nuaiin dil lai vela a awm laiin tui fawnah a vir buai ta chiam niin an sawi.
Pathianni khan sheriff-in a tirh Dive Team leh Search & Rescue Team chuan chin hriat lohva awmte chu an chet sualna, DL Bliss State Park kam hrul velah an la zawng zui zel a ni.
Dama lak chhuahte hi tute nge an nih puan a la ni lo.
Sheriff pisa chuan lawng a leh thu hi Inrinni tlai dar 03:00 velah hriattirna an dawng a. Tuiah mi 10 an la awm thu an dawng tel a, hetih lai hian khaw vawh lam chu nasa taka tlahniamin tui pawh a phul nasat vanglai a ni.
Reno Gazette Journal chuan Inrinni chawhnuah khan khaw vawh lam hi tui khang theihna khawpah a tlahniam niin a tar lang a, Sierra mountain leh a chhehvel dilah hian ruah leh vur pawh a tla niin a tar lang.
Online-a video darhah chuan tui fawn nasa takin a hunna hmuna lawng dingte chu a vawrh kang lawp lawp hlawm a. Thuneitute chuan lawng chhiate pawh a awm nual nia sawiin heng lawng atanga thil tha lo put avangin tui pawh a bawlhhlawh thei niin an sawi.
San Francisco Chronicle chuan lawng chetsualna thlenna hmun hi lung tamna hmun, Rooster Rock an tih lai a ni a, a thuk zawng hi feet 300 chuang niin a tar lang.
Lake Tahoe hi North America-a alpine lake lian ber a ni a. A thuk zawng hi chawhrualin feet 1,000 niin University of California, Davis chuan a chhinchhiah.