Langtlang taka eirukna?

Tunhnaia Sialhawka buhfai sem tur indaihloh chungchang social media-a tarlan chungchangah, a changtu supply minister chuan thil a dik loh dan zawnchhuah a tul thu leh, buhfai retailer-te kut hah man ennawn thaa a hriat thu a sawi a.
Retailer-te hian mipui chan tur Kg 10 zel atangin Kg 2 la thenin Kg 8 an semchhuak tihna a ni a; langtlang taka mipui buhfai eirukna a ni awm e.
Hei hi tunhma atanga lo practice tawh a ni a. Sawrkar thar a lo piang a, ‘dik takin buhfai sem tawh tur’ a ti thei bik lo nge, Kg 10-ah Kg 8 semchhuah thin chu, ‘Kg 10-ah Kg 9 ni tawh rawh se’ an rawn ti ve leh ta a. Hetah pawh hian mipui buhfai chu Kg khatin a la kim ta chuang lo a.
Tun sawrkar thar chief minister hian sawrkar thar lakluh a nih hnu lawka press conference a neihah khan, “Tun atang chuan, mi tinin dik takin thil kan ti tur a ni a, diknaa rorel a intan tawh hnua tisual leh chungah erawh chuan kan khauh dawn…” tiin a sawi a. He thu a sawi hma lamah hian, “Sawrkar thar hian kan bul tan nan, Lal Isua thusawi, ‘Kal la, tisual leh tawh suh’ a tih kha kan rilruah kan vawng reng a. Tunhmaa thil lo kal tawh, inchhui vak vak emaw, khatiang lampang kha kan rilruah a awm lo…” tiin a sawi bawk.
‘Kg 10-ah Kg 8’ hi tunhma atanga lo kalpui thin a nih chuan, ‘langtlang taka eirukna’ a lo thleng char char angah a ngaih theih ang a; a mawikhai zawnga sawi dawn pawhin, “retailer-te kut hah man hi mipuiin direct-in an lo pe char char mai” tihna tluk a ni thei bawk ang.
Eirawngbawlna gas tihchingpen a nih dan kan hre vek a, NGO lam thlengin an hahpui a. Sawrkar hnuaia legal metrology dept pawhin mipui awareness pein, ‘gas semna hmunah cylinder buktir thlap thlap tur’ ti tein an hrilh thin. Chutih laiin, buhfaiah chuan mipui chanpual tur buk tih tlin loh dan kan lo inzirtir hlauh niin a lang.
He thil a lo intan dan hi chhui chian a, dik taka mipuiin an chanpual tur an chan theih nan sawrkar hian hma la se, ‘kal la tisual leh tawh suh’ tih hi kan zawm tlan a ngai ta niin a lang.