Larsap leh MP-in kawng sawidun

Rajya Sabha MP K Vanlalvena chuan Inrinni khan larsap Dr Hari Babu Kambhampati chu Raj Bhavan-ah a hmu a. Mizoram tana thil pawimawh an sawi dun.
Myanmar ram buainain a nghawng harsatna chi hrang hrang an sawi a. Act East Policy hmanga Ministry of External Affairs-in a thawh mek, Mizoram chhimlam atanga Bay of Bengal kam Sittwe thleng tur KMMTTP Road project hna thawh mekin harsatna a tawh sutkian dan tur an sawi. Myanmar kaltlanga Mizoram leh Thailand thlunzawm tur Zokhawthar to Maesot (Thailand) kawngpui siam mekin harsatna a tawh sutkian a nih theih dan tur bakah Indo- Bangladesh border trade centre Tlabung- Kawrpuichhuah a din tur hna muang lutuk an sawidun bawk.
Hengte hi a tul anga Ministry of External Affairs leh Ministry of Commerce and Industry-a thlen turin hmachhawpah an dah a ni.
Larsap chuan Bairabi to Sairang rel kawng siam mekah lei dawh lai a chim avanga zawh hun tur a khawtlai phah chu pawi a tih thu a sawi a. KMMTTP Road hna tihkhawtlai a ni chu pawi a tih thu sawiin, heng kawng pahnih hi zawh a nih hunah chuan Mizoram mipuiin ei leh barah nasa takin hma an sawn phah a beisei tih a sawi.
Myanmar border fencing siam tumna leh chumi kaihhnawih thil leh a nghawng theih pawh larsap leh MP hian an sawidun a ni.