Last 8 lut zinga langsar Sabalenka

Last 8 lut zinga langsar Sabalenka
A grasscourt Grand Slam title hmasaber tur a beisei mekna kawngah Belarusian top seed Aryna Sabalenka chuan Pathianni khan rim taka thawkin Belgian Elise Mertens lakah 6-4, 7-6(4) hnehna a sualchhuak leh ta hram a; Wimbledon quarter-final match pakhatah women’s singles draw lama la dam zinga upa ber Laura Siegemund a hmachhawn ang.
Sabalenka leh Mertens hi tunhma lamin um 12 teh meuh an lo inhmachhawn tawh a, tah chuan Balarus chhuanvawr hi vawi 10 chakin, tunum Centre Court ruahsur hnuaia an intawn lehah pawh hian rinkai zawk a ni leh ngei a, mahse, rin ai tak khan Belgian a ang thei a, set hmasa zawk chu Sabalenka khan harsatna lian lutuk tawk loin la mai bawk mah se phuba lak chaka tuihal huam huam tura ngaih Mertens khan set hnihnaah awlsam taka inpek a tum mai bik hauh lo a, a lo hmachhawn fo tawh a nih angin a cheng pawh a hre thawkhat ve tawh tura ngaih a ni a, vantlang beisei aiin a ang na thei ta zek a ni!
Round of 16 inkhel dangah mak angreng taka thleng thui ta zek Argentine lucky loser Solana Sierra kal tluang lai chu German veteran tih theih tawh mai tur kum 37 mi Laura Siegemund chuan a dangbet ta nge nge a, Court Two inbeihna awlsam angreng takah chet fuh riau chang nei Siegemund hian world number 101 lakah zahngaihna a lantir duh hak lo a, 6-3, 6-2 hnehna changin, a hmabaka ding world number one Sabalenka erawh a khirh alh tura ngaih a ni!
Seeded player an tlak phai duak hnua last eight lut dang kan hmuh leh chu unseeded Anastasia Pavlyuchenkova niin, khawl hmanga out leh out loh enna felhlel (automated line-calling malfunction) avangin a point hlu tak tur pakhat chhuhsak ni mah se Britain lawmna ni rei phian Sonay Kartal chu 7-6(3), 6-4-in a hnawtchhuak ta tho a, inbeihna hautak zetah damkhawchhuakin quarter-final a inhlangkai.
Russian French Open runner-up hlui laka tlawm ta kum 23-a upa Kartal kha women’s singles draw-a Briton dam awmchhun ni tawhin, tawnhriat ngah tawh player kum 34 mi lakah tualchhung mipui lawmna a thlen zo ta lo a ni.
Pavlyuchenkova nena semi-final luh inchuh turin Amanda Anisimova pawhin Wimbledon result a neih hat ber hun tluk leh chiah chungin a um hnihna’n quarter-final a lut.
American 13th seed Anisimova hian Czech 30th seed Linda Noskova lakah 6-2, 5-7, 6-4 hnehna changin, tunhnai kum hnih liamta chhunga beisei loh taka Czech player pahnih Marketa Vondrousova leh Barbora Krejcikova-te’n All England Club-a women’s singles title an sualchhuah nawlh hnuah Noskova hian a chipuite hnung a zui zo ve ta rih lo