League khelh thumah Bayern chak ve ta hram

Hun pekbelha Harry Kane-a goal hnihna lut hmangin Inrinni zanah Bayern Munich chuan 2-1-in an mikhual RB Leipzig an hneh hram a, league an khelh hnuhnung vawithuma an vawikhat chakna niin, hmahruaitu Bayer Leverkusen lakah point riat zetin la hniam.
Allianz Arena inkhela mualneitu team goal hmasa zawk hi second half tir lam minute 59-a Kane tihluh niin, minute 70-ah Benjamin Sesko chuan Leipzig siphurh a sut a; German giants hi chak zo lo leh thei mai dawna an lan hnu hun pekbelh tir lamah England captain Harry Kane chuan Choupo-Moting siamsak atangin a goal hnihna leh home team chakna goal ni zui ta a thun a, season kal laia la tlawm ve lo Leverkusen an la um kal ve zel.
Goal hnih khungtu Kane chuan hmahruaitu team an nawr zel tur thu sawi chungin, “Vawiina kan khelh dan ang taka khelh chhunzawm zel hi kan ngai dawn a, he game-a kan chak hi a tha a, season tawp thlenga kan insanmar zui zel a ngai. Kan bansan dawn lo a, tawpsan thei kan ni lo,” a ti.
Inrinni hnehna an sualchhuah hma lawk khan coach Thomas Tuchel chuan season tawpa a chhuah ve tawh tur thu a nemnghet a, an boss chhuak tur lawmna’na chak erawh an nih hmel loh!
Bayern hi season hnuhnung 11-ah khan German champion an ni zawn chho fai vek a, kuminah erawh an title kawl lai an humhim theih hmel loh a, eng trophy mah la loa season hmangliam thei dinhmunah an ding mek a ni!
Nikum August thla khan German Super Cup-ah an tla fel tawh a; November thlaah German Cup second round atangin third-tier Saarbrucken chuan an pet thla bawk.
Tun Inrinni hmaa an league game khelh hnuhnung pahnihah an tlawm tih tarlan a ni tawh a, chu’ng game hnihte chu February ni 10-a hmahruaitu Leverkusen muala sithum faia an tlawm tum leh a dawtleh kartawpa Bochum muala 3-2-a an mualphonate kha niin, Champions League last-16 first leg lamah ni se sikhat faiin Lazio an ngam lo ringawt tawh bawk.
Dinhmun chhe taka a team enkawl lai an din mek chungchangah Tuchel chuan amah chauh chu club chhunga buaina a nih loh thu a lo sawi tawh chungin karliamta khan season tawp ruala a kalbo ve tawh tur thu a nemnghet ta nge nge a ni.
Nikum nipui insuan hun laia Spurs chhuahsana Germany a pan hnuah Kane hian inelna hrang hrang belhkhawm match 31 atangin Bundesliga goal 27 a thun tling tawh a; season kal laiah pawh Bundesliga top scorer ni mekin, amah hnaihbertu Stuttgart player Serhou Guirassy lakah goal kua zetin a chungnung tawh.
Tun dinhmuna Bayern Munich goal thuntu langsar ber ni mek Kane hian season tawp hmain league game 11 khelh tur a la nei a, hetih chhung hian Bundesliga season khat chhunga goal khung hnember record ding lai tluk turin goal 14 a la mamawh.
Kum 2017-18 season-ah khan Tottenham tan game 48 atanga goal 41 thun chungin season khat chhunga a goal khung hnember record a siam a, kha mi tuma a mimal record siam pawh kha kumin hian a khum zo dawn em tih ngaihchan mek a ni.
Europe league lian zual pangaa khel mekte zingah Englishman hi goal khung hnem ber ni mekin, amah hnaih bertu Paris St-Germain striker Kylian Mbappe chuan season kal mekah goal 21 a nei ve tawh.
Kane hian Kevin Keegan leh Jadon Sancho-te lehpelin English player zinga Bundesliga season khat chhunga goal thun tam ber nihna a chelh tawh bawk.
Bochum laka goal a thun tum khan season khat chhunga Bundesliga goal 25 khawl tling rang ber a ni a, Leipzig laka a goal hnih tihluh leh nen league campaign kal laiah goal 27 a nei tling tawh.
Bochum game-a a record bawk sawi leh ila, kha match kha Bungesliga game 22 a khelh tlinna niin, goal 25 ngah tling tura game mamawh tlember record siam hnuhnungber Borussia Dortmund striker hlui Erling Haaland-a record a chawkchhia a; debut season-a goal 25 nei chunga Bayern record lo siam tawh tu Luca Toni record a khum ta bawk.
Kum 30 mi hian Bundesliga record dang khum tur hnaivai a la nei a, chu chu kum 2020-21 chhunga Bayern striker hlui Robert Lewandowski goal 41 kha a ni.
Leverkusen 2-1 Mainz
Zirtawpni khan hmahruaitu Bayer 04 Leverkusen chuan Granit Xhaka leh Robert Andrich-te goal hmangin an mikhual Mainz 05 lakah 2-1 hnehna an chang leh a, game 33 chhung lawm loh zawn kha German record thar a ni.
Season thara Barcelona boss ni tura sawirik zinga mi Xabi Alonso hnuaiah Leverkusen hian chak takin title kawng an zawh mek a, an hnuai chiaha pahnihna luahtu Bayern Munich kuta German league title tang khawng laklawh tlat chhuhsak mai thei dinhmunah an ding zui zel.