Lei tlahniam zel ven leh in chim thei thiah tul an ti

Vaivakawn – Zohnuai kawnga lei tlahniam zel tur ven nana ruahmanna siam leh a bulhnaia in chim mai thei thiah chu sawrkar hotute leh khawtlang hruaituten tul an ti.
Nilaini zing khan Disaster Management & Rehabilitation minister K Sapdanga, PWD minister Vanlalhlana, PHE minister Prof Lalnilawma leh sawrkar hotu dangten helai hmun hi an enfiah a. DM&R minister chuan fur ruah tui tam avanga Vaivakawn – Zohnuai kawnga lei tlahniam leh leimin avanga harsatna thleng chu pawi a tih thu sawiin, sawrkar department hnuaia mithiamte enpuina hnuaiah ruahmanna siam thuai a tul tih a sawi. Hemi kawnga hma la tur leh ruahmanna bawhzui tur hian Aizawl bawrhsap pisa ruat nise tih a ni.
PWD minister pawhin khawtlangah harsatna lian zawk a thlen lohnan in chim mai thei dinhmuna dingte chu a rang lamin a thiah hna kalpui a tul tih a sawi a ni.
Minister-te, department hotute leh khawtlang hruaitute hi thukhawm nghalin, Vaivakawn – Zohnuai kawng lei tlahniam zel tur ven nan tui kawng siamthat tul an ti a; lei tlahniam zawn chhoa in chim thei awmte thiah tul an tih bakah lirthei lian leh load phur lirthei tlan khap rih tul an ti. Lei tlahniam avanga tui connection khaihlakte tan ‘connection point’ lailawk siam tum a ni bawk.