Leivung paihna tur ruahman ho

NHIDCL hnuaia four lane kawng laih zauh turah Vairengte leh Rengtekawn inkar, package 3 leh 4 laih huna leivung paihna tur, ‘muck disposal site’ atana hmun ruahman chu Thawhlehni khan Kolasib district bawrhsap John LT Sanga kaihruaiin sawi ho a ni a. Competent Authority for Land Acquisition, DFO, NHIDCL, Vairengte, Bilkhawthlir leh N.Chhimluang VC leh YMA hruaitute an tel.
Leilung hausakna humhalh chunga hmasawnna hna kalpui a pawimawh thu leh inbuktawk taka kalpui a nih loh chuan harsatna lian zawk thlentu a nih theih thu sawi a ni a. Kolasib paltlanga 4-lane kawng laih tum pawh a taka hna kalpui hma in ruahmanna fel tak siam hmasak a pawimawh tih sawi a ni.
Package 3 chhungah leivung paihna hmun 8 leh package 4 chhungah hmun 7 ruahman chu sawi ho niin, hna hi Engineering Procurement and Construction (EPC) zawm chunga kalpui tur a nih angin, leilung tichhe tam lo zawnga khawtlang duhdan leh a tul dan azirin hnathawh hunah leivung paihna hmun pawh tih danglam theih tura rel a ni.
Leivung paihna hmun hi NHIDCL-in ram a lak tawh pawnlam ami hman a nih chuan, zangnadawmna hranpa ruahman a nih loh tur thu sawi a ni a. Ram hawh man erawh contractor-te nen inbiakremna anga pek tur a ni. Chhut danin, leivung zaa 50 chu kawng laih thar huamchhung hmun hrang hrang hnawhkhah na’n hman a ni anga, zaa 50 dang chu leivung paihna hmunah paih tur a ni tih NHIDCL chuan sawiin, khawtlangin leivung hman tangkaina tur an neih chuan a remchan dan azirin ruahmanna siamsak theih a nih thu sawi a ni.
4-lane kawng tha tak a awm theihna’n ruahmanna siam kawngah, a vil kawngah, tul loa ram leilung tih chereuna thleng lo tura neitu nihna thinlung nena ven kawngah sawrkar, khawtlang leh hnathawktu turte tanrual a pawimawh tih bawrhsap hian a sawi a ni.