LENGPUI AIRPORT CHINGCHIVET (Thu lau kei mi AA phak tawk)

F. Lalremsiama
Chaltlang
8415994340
l A thuk pawh PTI-a rilru! Keimah ka lo chingchivet zaw ta mah mah? Pu Zuala(Thau-a) chuan “Choak bak va tum suh” a ti lai ka mitthla thei. Lengpui ram Airport atana thlang hmasatu,Zofa Politik mi lian hmasate zinga Pu Lalmawia(Zalen) pawh sawilan hmasak ka duh tawk lek, chiah lo si.
l Sorkarin ram leina lian tham leh hmasaa Pu Lalthanhawla, Chief Minister leh Pu Liamsuama Minister te (min la dampui) fak leh chawimawi hmasak ka duh bawk. He thiltih (Deal) ropui ber lai pawh ka lo atchilh ve kumkhua a ni miau. “Compensation Thlarau chhia(-va) leh Mantang ei(ru) hmel hmuh tur a awm lo!”! Ramneitute “Zonunmawi” cho chhuah a nih dan ka hrilh dawn che u hi. Mengin beng chhi teh un! Langtlang ualaua ka sawm ngawih ngawih lai che u hian.
l Ram neituten an ram (lei ram) man chhete pawh an dawng lo. Pu M.Lalmanzuala thuhretua sawm ka nap rap! An thlai leh theikung tih puitlinna atana sum leh tha an sen(ral) uiawm leh hmabak tha chan (ral) turte vanga zangnadawmna awm tawk chhut tlanga siamrem a ni theite kha dawn chiang teh. Hlemhlet, itsik leh uanthuan an rel lo. A dawng tam ber Pu Biakliana Sikulpuikawn ami khan cheng nuaih sawmparuk(nuaih 16) leh tlem chauh a dawng. Record fel tak hmuh tur a awm. Ropui ka ti thlawt!
l Thumak sawi nin theih loh ka va ngah thin pek em. Pakhat chiah, mahni mawnghlim nih tur hai lo leh hrereng chungin Airport laih tan phat, Aizawla Motor chitin awm zawng zawng deuhthaw mipui chhiarsen loh (multitude) phur, Synod lam Hruaitulu ber berte nen an rik luih luih “Ni ropui” lo thlen khan Pu Lalsawta nen, kan dawn(Vaibeldawn nilo) kan lo tisei thiam ve lo dun pek! Thatna tak, lungtiawi a ken ve tlat chu i haider phal dawn em ni? Khati zozai, hruaitu lian leh phanchangte zinga “Ber kai lo tur bera kan ngaih, Pu Nirupam Chakma kha zuk cheh hmasak ber tir teh reng a le” karei! An ti tih hriat kha a tawk leh lutuk. Dawn ve la i lung a awi na maw?
l First Five Year Plan-a Best Community Development Project tia India Home Minister, Pu KN Katju meuhin Aizawl Bawngkawnah “Aizawl — Linglei Jeep Road” min rawn tansaknaah kha chuan kan Missionary hlui lo zin, Pu Mena (EL Mendus) khan asin cheka kutthlak hmasaber! Lo Juxtapose teh??
l A dang pakhat leh chauh. Khatih vel lai khan Shimla khawpui bulah Airport kum khat vel lai an lo lai hmasaa an ti luih luih ve lo tihte kha la hrereng awm tak i maw? Mahse ka tunu Shimla khawpuia kum thum thuak MD zir zota khan Delhi – Shimla inkara vawi sawm tam, a nu damlo vilpui leh chawlh hmanga a pa Quarter-a a lo hawn thin lai khan vawikhat pawh Shimla-Delhi Flight a hmang miah lo. By Road hlirin a kal. Keini Lengpui Airport erawh kan tangkaipui nasa. Thu leh Hla pawh a tam phah, Politik zau zawk thlengin. Pu Zangena Zarkawt/Silchar, Air-dropping Supply laite pawha che nasa, sumdawng tawngchhuak kha i hriat thiam takin? Kan chetvelna leh thiltih a fel thlip thlep hi chuan kan la hlawk tawk lo zuk ti ve tlat a!
l Tunlai Lengpui Airport leh a bul vel ram inlei leh hralh thu te, IAF thleng thlenga Thu chingchivet chuan CBI chhuitir duha Lungrualna (Convergence?) Dik lo leh tha lo? Min hrinchhuahsak ang em? Vala lu a hai! A chhan tha tak tak sawi ka duh. CBI tana General Consent huau hi ka duh ve ngai reng reng loh a ni. Chiang taka he ngaihdan nei, sawi lang ve tawh chu Pu Rinawma IRS(Retd) Congress leh ZPM-a tlatlum tak hi a ni. Central Political Block-ah Issue-base zela tan lam neih duhtawk ZPM hi ka thlawp full thak. Ka hriatchin a zim chhe lo viau asin mawle!!
l Vaiho nena kan inkar thil tinrengah, “Sahteh leh Hawn huau” ka duh ve ngai reng reng lo. Safeguard ILP te RAP te ka duh nghet tlat. Loh theih loh tih ang vel hi ka Culture Lexicon-ah a awm lo hul hual. Politik kamchhia-sam-inphiarzawm, inmawngzawm leh Uire tih vawikhat mah ka ka atangin ka la chhakchhuak duh ve lo. I lo mark na nge?
l Tichuan, tun hma Senhri Magazine vullai atanga ka hmelhriat tha, heng thu sawi chiang thiam, hruaitu leh mimal chhiatpui chi tin zawn bik nei loa ziak ka lo chhiar ve kilh kelh te, Temami Pa thukhawchang, Hidden Lodge atanga thuhruk theih loa lang te, Pu Lalnunmawia Pachuau thuziak leh ZPM Minister leh Media hotu thusawi chanchinbu atanga ka lo chhiar vel ve phak lekte ka chhutkual den den a. Pu Rohmingliana te, Pu Hriata Chhangte te, Pu Henry-a hming leh sumhlawm hi chu a lang lian bur bur ta hle mai. Ka tana pawi ber ve lo chu Sorkar hnena ram hralh tur ka lo nei ve lo kha i ti mai ang. ZPM lam hian inhmachhawna inmelhrum mit a khap(blink) hmasa ber ta mai em te kan ti ta vel mai mai ang em? Nge Val Upa Council kan beng harh zo lo a ni kan ti mai dawn? I thlir zel rih mai ang u.