Leverkusen champion kum herchhuak ve ta nge nge

A zawna season hnuhnung 11 chhung tehreng Bundesliga title la ngat ngattu Bayern Munich vawklallenna thiatin Bayer 04 Leverkusen chuan Pathianni zanah an club chanchina a vawikhatna atan German top flight title an sualchhuak ve ta nge nge.
Bundesliga season kal laia game nga la awmah tlawm la nei miah loin Xabi Alonso chuan ropuina ramah a team a hruaikai a; league match 29 an khelh tawhah tum 25 chakin, draw vawili an nei tawh a, point 79 neiin, anmahni hnaihbertu Bayern Munich-in khelh inzatah point 63 an nei a, game nga atanga point 15 ruh tur la awmah Bayern hian point 16-in hmahruaitu an pha lo a, an tan Leverkusen hmakhalh ngaihna a awm tak loh avangin Alonso & Co. champion kum a herchhuak ve ta nge nge a ni.
Spaniard Alonso hoin Leverkusen hian Bundesliga match heti zat an khelh tawhah hian point riat chiah an la hloh!
Inrinni zanah Bayern chuan Cologne hnehin Alonso team kuta title lut mai tawh tur an la dang hram hram a, Pathianni zanah Leverkusen hian an khelmual hman thiam BayArena ngei maiah singa faia an mikhual Werder Bremen sawp chungin Munich club dan zawh mi an ni lo tih an lantir a; hamrik hnuhnung ber rik rualin Alonso team champion lawm an sapatal zui!
Liverpool leh Real Madrid midfielder hlui Alonso chuan an champion hnua media a hmachhawn hmasakberah an hun tawn chu a chhungte bakah thianthate leh an fans nen an lawm rih phawt tur thu a sawi a; German tihphung zulzuiin player-te’n an boss hi beer an leih a, huh hnuang chungin, “Tun hi coach ka nih hnua ka season puitling hmasaber a ni a, ka hun tawn hi a makin, a awihawm loh hial zawk a ni,” a ti.
Werder Bremen game-ah Victor Boniface chuan darkar chanve khelh tlin hma lawkin mualneitu team hmahruaina’n penalty a chhuihlut a, hei hi first half-a goal lut awmchhun a ni phawt.
Second half tir lamah Granit Xhaka leh Florian Wirtz-te’n inhnaih takin goal khat ve ve an thun belh a; chutah hun pangngai tawp hma minute sarih chhungin Wirtz chuan goal hnih dang a khung zui leh a, an champion-na inkhelah hat-trick a siam.
Tarlan tak angin, Leverkusen hlawhtlinna hian Bundesliga title hnuhnung 11 hui zo vektu Bayern rorelna a titawp ta rih a; tualchhung league-a an hlawhtlinna chungchuang tak piahlamah pawh title hraw dang pahnih beisei tur an la nei cheu a, German Cup leh Europa League lama an la dam avangin treble champion ni thei dinhmunah an ding zui zel a; tun season chhunga inelna hrang hrangah Alonso team hian tlawm an la nei lo!
October 2022-a Alonso an sengluh lai khan Leverkusen chu Bundesliga relegation zone-a tang mek an ni a, thla 18 an la ruai tling lo deuh hlek tihah Bundesliga champion an ni hman der!
Tarlan tawh angin, treble champion ni thei tur hian Europa League quarter-final first-leg an khelh tawhah sihnih faiin West Ham United lakah hma an hruai mek a, May ni 25 hian German Cup final-ah second-tier Kaiserslautern an hmachhawn zui bawk ang.
Season kal lai inelna hrang hrang game 43 an khelh tawha tlawm la nei lo team Leverkusen hi season tawp thlenga an tlawm lo fai vek a nih chuan kum 1963-65 chhunga inelna an hmachhawn zawng zawng match 48 chhunga tlawm pumpelh fai vek chunga Europe-a chak tluang rei ber record siamtu Benfica an hmakhalh thei dawn a ni.
Tun season-a competitive match 43 an khelh tawh atangin Leverkusen hi vawi 38 chak tling tawhin, draw vawinga an nei a; chuti zat game-ah chuan goal 123 an thun laiin goal 31 chiah an la chhuah a; an tlawm hnuhnunber chu kum 2023 May ni 27 daih tawh kha a ni!
Pathianni zana Werder Bremen an hneh rual khan Bundesliga season khat chhunga tlawm pumpelh rei ber record thar an siam nghal bawk.
A hma chiaha record chu Bayern Munich-a Pep Guardiola season khatna (2013-14) chhunga game 28 an tlawm lo tling kha a ni.
Kum 120 zeta upa ni tawh Bayer Leverkusen hi Bundesliga title la thei club 13-na chiah niin, 2008-09 champion Wolfsburg hnu lama German champion thar ni leh thei hmasaber an ni nghal.
Leverkusen hi Bundesliga-ah hian tum nga tehreng runners-up anni tawh a, Munich club an ngam loh zel avangin hminglemah ‘Neverkusen’ tihte an lo hlawh hial tawh a, tunah erawh Bundesliga title chu an ta a ni ve ta nge nge.
Pathiannia an hlawhtlinna kha kum 1993 daih tawh German Cup final-a sikhat faia Hertha Berlin an hneh hnua trophy an sualchhuah leh vawinghatna a ni nghal.