Lewandowski penalty goal chakpuitu Barca

Lewandowski penalty goal chakpuitu Barca
Celti Vigo khelmual lut Barcelona an chak zo dawn lo emaw tih hnu hun pekbelh minute sarihnaa Robert Lewandowski penalty chhuihluh hmangin Barcelona chuan 2-1 hnehna sualchhuak hramin, Pole Lewandowski hian season kal laia La Liga match 24 a khelh tawhah goal 13 a tilut tling chiah.
A hma chiah chawlhkar tawpa Granada muala 3-3 draw hlawhchhuak tawh Catalan team zinchhuak tan Poland striker hian chawlhlawk hma chiah minute 45-ah mikhual hmahruaina goal khung bawk mah se mualneitu team hian second half tir lam minute 47-ah Iago Aspas chuan table mawngphah atanga chhiar chhoha a palinaa thu mek Celta siphurh sutin, tlak hlau mualneitu team hian La Liga palian laka point khat tal hlawhchhuah tumin goal venhim lam an buaipui chhunzawm a, an hlawhtling tluanchhuak thei mai dawna a lan hnu hun pekbelh zawh dawnah penalty an chawi ta hlauh a ni.
Ti hian league khelh 25-ah Nou Camp club hian point 54 hum chungin table-ah pathumna an luah chhunzawm a; Zirtawpni khan pahnihna luahtu Girona chuan 1-1-in mualneitu Villarreal an inhnehtawkpui a, nizan result tarlan hman loha hmahruaitu Real Madrid-in Rayo Vallecano khelmuala point thum an thawhchhuah leh theih chuan hun rei tak title beisei pha ve zawnga khawsa ngar ngar Girona nena an inkar chu point riat zetin an pawtzau tawh dawn a, mahse, rin loh taka hmahruaitu ni chho ve zak zak reng Girona hian game khatin an la khel tlem thung ang.
Barcelona kha second half chanve hnu lama team hlauhawm niin, season kal laiah hian minute 76 hnu lamah goal khungin, inkhel tawp hnaih lama an goal khung bik hmang chuan point 24 zet an thawkchhuak tling tawh a, Spanish top-flight season kal laia minute 76 hnu lama goal khung hmanga point rut hnem ber an ni.
Season tawp ruala a ban tur thu an boss Xavi ka atanga a rikchhuah hnuah Catalan team hian match li khelin tlawm an la pumpelh fai vek a; tunkar Nilaini zan hian Champions League last 16-ah Napoli an tum dawn e, he tournament chiah hi tun season-a an title beisei theih chu ni tawhin a lang.
Inrinni zan inkhel dangah palina Atletico Madrid chuan an mikhual Las Palmas laka zahngaihna lantir duh loin 5-0 hnehna nen an chung chiaha awm Barca nena an inthlauhna chu point thumah bawk an dah leh.
He inkhelah hian Rojiblancos manager Diego Simeone chuan Champions League last-16 khela Inter Milan an luhkhung tur thlirin a player pawimawh a chawlhtir nual a, chu’ng zingah chuan France forward Antoine Griezmann pawh telin, Palmas hneh tur chuan a team khawng ber dawttu pawh a tawk em em a ni!