Li Qiang-an economy ngai pawimawh

China premier thar Li Qiang chuan thuneihna a chan hnua thusawina a neih hmasak berah an ram economy siam that chu thupui bera a neih tur thu a sawi.
Kar kaltaa sorkarin growth target 5% an siam chu awlsam taka tihhlawhtlin theih a ni dawn lo tia sawiin mahse tichung chuan economy chuan hmasawn lama pan tho thung tiin a sawi bawk a.
Khawvela economy lian ber pahnihna hi Beijing-in hun rei tak zero-Covid policy a kalpui nghawng avangin a la insiamrem mek zel a. Hei bakah hian China mipui pung zel tur tlahniam leh hna hloh zel te chuan harsatna a thlen bawk.
Hei mai bakah hian China leader Xi Jinping-an thuneihna a sawhngheh zual a, private business te chep zawka a siam chuan investor te confidence a tihniam hle bawk a.
Heng zawng zawngah hian Li chuan, “Nikum khan private economy chungchangah leh entrepreneur te chungchangah ngaihdan dik lo tak a awm a. Private economy environment kan siamtha tial tial anga an tan hmun awl a tam tial tial zawk ang,” tiin a sawi.
Li chuan US nena inthianthatna lam hawi sawi bawkin, “China leh US hi thawk dun tur an ni a, thawhho ngei ngai a ni. CHina leh US an thawh dun chuan thil tam tak tihhlawhtlin theih a awm a. Inrahbehna hi a tute tan pawh a tha lo ve ve,” tiin a sawi bawk.
Li Qiang hian Shanghai communist party chief a nih laiin zero-Covid lockdown khauh ber kalpuiin China economic hub a khawih na hle a, mi tam tak te ei leh bar tlachhamin a siam hial a ni. China zero-Covid policy hi Xi signature policy anga ngaih niin party hruaitu lawkte chuan tihhlawhtlin ngei tumin an kalpui na hle a, sawiselna nasa tak a awm avangin leh duhlohna lantirna nasa taka a awm hnuah nikum December thla khan hnawl a ni zui a ni.
Li Qiang hi nikum October thla daih tawh khan Party Congress chuan premier turin an chhawp chhuak tawh a, mahse, Thawhtannia tiak chauh Communist Party Two Sessions neihah official in premier atana hlankai a ni chauh a ni.
Premier a nih anga a hna pawimawh ber chu China economy siam that niin Li Qiang premier a hlankai hian mi tam tak te chu barakhaihin a hmain central sorkar ah hna la thawk ngai lo leh tawnhriat pawh nei lo a nih vang a ni pakhat a. Mahse, Xi Jinping tana rinawm bur a ni thung a, Xi nen China a province hausa ber pawl Zhejiang ah kum 2022 atanga 2007 inkara lo thawk dun tawh an ni.
“State Council machinery enkawl tawh tur a nih avangin a insiamrem ngei chu a ngai ang a, mahse, Shanghai-ah Zero-Covid practice lo kalpui tawh niin China a khawpui lian ber niin State Council agency te nena thawhhona tha nei tawh an ni thung a,” tiin Victor Shih, University of California, San Diego a professor chuan a sawi a.
“Xi-an a ngaih pawimawh thilah chuan inpawhfan vak ngaihna a awm chuang lo mai thei a. Mahse, Li Qiang hi Xi Jinping hneh thei leh rilru thlaksak thei ber tur chu a ni,” tiin Victor Shih chuan a sawi bawk.
Chairman Mao Zedong hnua China a leader thiltithei ber Xi chuan kar kalta khan Two Sessions neihah presiential term thumna chelh tura hlankai a ni a. China-ah hian president chu term hnih bak chelh theih loh reng a nih laiin Xi Jinping an term thum a chelh theih nan an siam danglam a ni.
“Tun hi he ram president term thum ka chelhna tur a ni a. Mipuite min rinna hi ka tan chuan min tichak tu ber niin ka mawhphurhna te hlen tura min tikaltu ber a ni,” tiin Xi chuan a sawi.
“Hmasawnna awm nan chuan security a pawimawh ber a, ngelnghehna chu hausakna bul a ni,” tiin a sawi bawk.