Library atan lehkhabu 118 lei dawn

Mizoram State Library-in lehkhabu an lei thin a, hei hi lehkhabu ziaktute innghahna pawimawh pakhat a tling; Mizo lehkhabu a chhuah tam phah tiin a sawi theih ang. Kum kal mek 2023-24 atan lehkhabu 118 lei an tum a, hei hi tihfel a ni tawh.
State Library hian an lehkhabu lei hi library hrang hrangah an sem darh leh a, hei hi lehkhabu thehdarhna tha tak a ni.
India sorkar hnuaia Raja Rammohun Roy Library Foundation (RRRLF) atangin State Library hian pawisa an dawng a, hei hi lehkhabu lei nan an hmang thin. State Library hnuaiah hian recognised library 511 a awm mek a, an lehkhabu lei hi chung library hrang hrangah chuan an sem thin.
State Library enkawltute chuan RRRLF hian kum khat chhunga an sum hmuh tur zat hi an hrilh a, chuta tanga 10% chu state sorkarin a lo tum a, lehkhabu lei nan an hmang thin tih an sawi. An sum hmuh zat azirin an lehkhabu lei theih zat pawh kum tin a inang lo thei tih an sawi bawk.
2023-24 hian lehkhabu hrang hrang 118 an lei dawn a, lehkhabu man azirin lehkha pakhat an lei zat (a copy zat) hi a inang lo. Kuminah hian an ngaihtuah laiin library 513 an nei a, lehkhabu an lei tur zingah bu 513 a awm. Tun hnaiah library pahnih chu recognised an nihna a tawp a, library 511-ah lehkhabu hi sem a ni ang.
Kum hmasa 2022-23 khan lehkhabu 152 an lei a, mahse hemi kum hian RRRLF lamin pawisa an pek tak mai loh avangin lehkhabu man hi State Library hian an pe thei lawk lo. 2019-20 khan lehkhabu 147 an lei a, 2020-21 khan 154, 2021-22 khan 145 an lei.
Mizoram State Library hnuaia recognised library-ah hian a tam ber chu YMA enkawl a ni a, RRRLF hian a theih ang angin an enkawl thin.
State Library enkawltute chuan library thenkhat chu lehkhabu leh vantlang bungrua te inawm pawlh nuaina te a ni a, committee room atana hmang te an awm bawk a, heng hian RRRLF lam mit a tlung lo thin tih an sawi.