Libya-a nunna chan 5000 chuang tawh

Libyan city Derna a tuilian avanga nunna chan mi 5,300 chuang an ni tawh tiin official te chuan an sawi a.
“Tuipuiah ruang tam tak a lang mek a ni” tiin Hisham Chkiouat, minister of Libyan eastern administration chuan a sawi a.
Mitthi ruangte chu saranga tuama a huhova a theih ang anga phum ni hlawmin Libya chuan tanpuina a ngen mek bawk a.
Pathianni khan tuilian nasa takin Derna khawpui chu hnawlin hei hi Storm Daniel avanga dam luan liam nasat vanga thleng a ni.
Building tam tak chimin rescue team-te chuan dam chhuak te zawngin theihtawp an chhuah a, mahse, beisei a chau hle a, nunna chan an pun belh zel tura ngaih a ni.
Officials te chuan mi 10,000 chuang an chin hriat lohin an awm mek an ti a, mi 30,000 chuangte chuan chenna an nei lo mek tiin United Nations’ International Organization for Migration (IOM) te chuan an sawi
Morque leh damdawi In te chu ruangin a khat a ni ringawt a. Libyan doctor Najib Tarhoni, Derna bula damdawi in a thawk chuan tanpuina an mamawh ngawih ngawih thu a sawi a.
“Damdawi In chhunga ka thian te engkim an chhungte pawh chan vek an awm nual a ni,” tiin a sawi a.
“Kan dinhmun dik tak miten hriat se ka duh a, logistic lama puihna te kan mamawh a, hnawmhnawkin a khuh tangte hriat nan uisathiamte pawh kan mamawh a. Puihna kan mamawh ngawih ngawih,” tiin a sawi.
Médecins Sans Frontières (MSF) te chuan Derna an thlen tep thu sawiin mamawh hmasak pawimawh te phuhruk a nih theih nan theihtawp an chhuah mek thu an sawi a.
Derna kawthler te chu bawlhhlawh leh vehicle tuilianin a hawrkhawmin a khat a, hmun thenkhatte chu hriat theih pawh a ni tawh lo an ti bawk.
Tuilian a kam tawh a, bawlhhlawh tam tak a kamsan thung a. Nunna chan zingah elite footabller thahnem tak an tel tiin Libya Football Federation (LFF) te chuan an sawi bawk.
Libya ram hi kum 2011 a hun rei tak rorel tawh Col Muammar Gaddafi paithlaka tihhlum a nih hnuah buainain a khat a. Oil lama hausa tak ram hi hmun hnihah inthenin khawvelin a pawm zawk sorkar chu capital Tripoli behchhanin an awm a, sorkar-na la pakhat erawhin khawchhak lam an thunun thung a ni.