Ligue 1 game 200-naa hat-trick siam Mbappe

Pathianni zana 6-2 tehrenga mualneitu Montpellier an sawpna inkhelah goal thum khung chungin Kylian Mbappe chuan a Ligue 1 game 200 khelh tlin a lawm a, Paris St-Germain chuan league table-a an hmahruaina sawhnghet zelin, anmahni hnaihbertu Brest lakah point 12 zetin an fal ta a, champion rim an nam leh rum rum tawh.
He inkhela mikhual goal hmahruai hi Portugal international Vitinha thun niin, a hnu rei vak loah Mbappe chuan angle zim tak atanga khung belhin, darkar chanve khelh tlinah Arnaud Nordin chuan home team siphurh a sut then a, chawlhlawk dawnah Teji Savanier chuan penalty atangin Montpellier siphurh sut zawhna a chhuihlut ve leh.
Second half tir lam minute 50-ah Mbappe goal hnihna lutin, tuibur hmuam da pawh tling loah Lee Kang-in chuan PSG goal lina a thawh a; minute 10 a kal leh tihah Mbappe hat-trick siamna goal hmuh tur awm zui lehin, Ligue 1 hmahruaitu team goal rukna leh he inkhela goal lut hnuhnungber ni zui ta hi hun pangngai tawp hma minute khat chauh awm tawha Nuno Mendes tihluh a ni thung.
France striker Mbappe hian season kal laiah league game 24 atanga goal 24 thun tling chiahin, hat-trick vawithum a siamna a ni bawk.
Vitinha through ball hmanga a goal thumna thun kha inelna hrang hranga a club vawn lai tana Mbappe goal 250-na chiah niin, season kal lai inelna hrang hrangah PSG tan match 37 atangin goal 38 a khawl tlinna a ni nghal.
Tarlan tawh thin angin, kum 25 mi Frenchman hian season tawp rualin PSG a chhuahsan ve tawh dawn a, Real Madrid lama a kal tur thu a sawichian hnuah manager Luis Enrique chuan Mbappe tel loa khawsak dan lo zirlawk duhna avangin France captain hi bench lamah a dah ta fo a, PSG league game hnuhnung pathumah khan vawihnih ngawt bench atangin a lut a, Monaco an tum tum pawh khan inkhel entute zingah a nu a thu ve chungin half time-ah a lut ve chauh a nih kha!
Spain rama a chhuah hmain Mbappe hian PSG awh ber Champions League trophy lakpuina chance a nei kal mek a, quarter-final pakhatah Real a zawm huna a hmelma lian ber tur Barcelona a hmachhawn phawt dawn a ni.
Hei lo pawh hi hmabak hraw tak pakhat a la nei mek a, tunhnai season hnuhnung pangaa a vawilina’n league title an beisei kal mek a, chumi tihlawhtling tura an elpui lianber Brest chu Pathianni inkhel dangah chak zo loin an mikhual Lille nen 1-1-in an inhnehtawk a, PSG tan title a hnai leh kuar tawh!
Stade de la Mosson muala an hnehna sualchhuah kha Paris St Germain tan an league match hnuhnung vawilia an vawikhat chakna chiah ni mah se khelh 26-a point 59 hum chungin Brest laka an chungnunna a chhah leh tawh hle a, Mbappe hian a kalchhuah hma ngeiin league title chu a hawnsak leh nge nge dawn nia ngaihna a lian chho leh hle tawh a ni.
Inkhelh banah manager Luis Enrique chuan theihna sang bik leh tumruhna khing khawng kawltu player tha bik a enkawl miau avangin pa vannei tak a nih thu a sawi a, a rang thei ang bera league title sualchhuah thuai thuai an duh thu a tarlang tel.