Lirnghing laka inpuahchah \ha Taiwan
Kum 25 chhunga lirnghing na berin Taiwan a nuai a, building thenkhat tichhiain nunna chan pawh an awm a. Mahse, a hma atang tawha lirnghing na tak thleng thei reng tih hriaa inpuahchahna an neihthat avangin chhiatna nasa thleng tur a veng hle thung.
Taiwan hi khawvela lirnghing na tak thlen theih renga Pacific Rim a ‘Ring of Fire’ huamchhunga awm niin a thenawm Japan ang bawkin lirnghing na tak tak tawk reng ram a ni.
Nilainia Taiwan lirnghing kha 7.4 magnitude laiaa na niin kum 1999 a mi 2,400 chuangin nunna an chan phahna 7.6 magnitude laia na hnua a nghin nat ber a ni.
Mahse khawvel ram danga lirnghing thleng te lakah chuan Taiwan bikah tihchhiat a nei tlemin nunna chan pawh an tlem fal hle a ni.
February 6, 2023 khan Turkey a 7.8 magnitude a na nghing vangin nunna chan 53,000 an awm a, Syria ah nunna chan 6,000 vel an awm bawk a, building a tihchhiat chu 39,000 vel dawn a ni bawk.
September-ah 6.8 magnitude a na a lirghing avangin Morocco ah mi 3,000 in nunna an chan a, chenna In 60,000 chuang a tichhe bawk.
Afghanistan Herat province-ah nikum October khan 6.3 magnitude-a naa a nghin avangin mi 1,200 velin nunna chanin chenna In 40,000 vel a tichhe bawk.
Mi thiamte chuan lirnghing laka him nan chuan building regulation tha leh bawhzui that a pawimawh ber an ti a. Structure chim chu nunna chan tam phahna chhan ber a ni an ti bawk a.
“Lirnghing lian tak mahse thil tichhe tlem tak a awm fo a chhan chu a sawi a na lo va, building te lirnghing sawi dawl zo tura duan te an ni hlawm bawk. Chutihrual chuan lirnghing tenau zawk mahse sawi na tak leh building te sak that si loh a awm thung a, chungah chuan building te a chim thin a ni” tiin US Geological Survey te chuan an sawi.
Taiwan hmalakna?
Taiwan ah chuan kum tam tak chhung lirnghing a dawl zo turin building codes an hmang tawh a, khawvel hmun danga lirnghing na zawk a thlen apiangin building code te chu ennawnin siamthat ngai siamthat thin a ni.
Kum 1999 khan lirnghing na tak tawkin building 51,000 vel a tichhia a, hemi hnu hian Taiwan chuan building code te chu update in lirnghing dawl zo turin steel bar te chu lei a nghina a insawi kual theih tura ruahman a ni zui a ni.
Taipei 101 skycraper tun hma deuha khawvela building sang ber pawhin lirnghing sawi dawl zo turin 660-metric ton damper a nei a ni.
Kum 2009 khan Taiwan a building 80 velin damping an nei a, kum 2022 a nih meuh chuan 1,000 a chuang tawh bawk.
Building hlui te
Sorkar chuan building codes update hmaa building sakte chu reinforcement siam turin a ti vek a ni.
Heng building hluite hi lirnghing thlen changa ngaihtuahawm berte an ni a, mahse chung building hlui te reinforce tum chuan sum lamah harsatna tawh a ni thung.
Kum 2016 a president ni tan Tsai Ing-wen chuan building hlui zawkte him zawka siam a nih theih nan hma a lak tur thu a sawi bawk a. Kum 2022 khan building ground floor nghet tawk nei lote chu a rang thei ang bera siamthat tur an ti bawk.
Building regulation piah lam hmalakna?
Technology lama sang tak Taiwan chuan lirnghing na tak thlen hma lawka mipuite fimkhur tura hrilhna tur advanced warning system an siamchhuak bawk a.
Chu system chu a kum telin thuamthat zel niin tunah chuan smartphones leh high-speed data connectivity te nena thlunzawm a ni tawh a ni.
Taiwan thuneitute chuan kum tinin lirnghing tam tak an detect a, mahse, lirnghing zingah tlemte chauh chu hriat theih khawpa na a ni chauh zawk a ni.
Japan ang bawkin Taiwan mipuite chuan school leh hnathawhnaah te lirnghing thlen thuta inven leh chetlak dan turte an zir reng bawk.