Lirnghing na takin Taiwan a sawi

Taiwan chuan kum tam tak hnua lirnghing na ber tuarin April 3 zing lirnghing vangin mi pasarih in nunna chanin mi 730 chuangin hliam an tuar bawk a. Building tam tak tichhia in tsunami tenau a siam mek.
Lirnghing intanna bul lawk coastal city Hualien a building chhawng nga a chhawng khatna a chim avangin a chung lam zawng chu 45-degree angle in thle buiin a awm a ni.
Taipei ah pawh building hlui tawh leh sak thar office complex atanga tile tla a nasa hle a. School te pawh rauhsan niin naupang te a bul hnai field ah tlankhawm tir an ni bawk.
Taiwan mipui maktaduai 23 te veivahna ber Train service pawh tihtawp lailawk niin chutiang bawkin Taipei a subway te pawh tihtawp lailawk a ni bawk a.
Lirnghin hun lai hi zing lam dar 8 hma lawk hnathawk tura chhuah vanglai a ni a. Mahse, Taiwan chu lirnghingin a nuai fo ram a nih avangin inzirtirna a thaa mipui phili chhung a rei lo.
Taiwan a Formosa Petrochemical chuan Mailiao rifinery a an hna chu fimkhur thu ah an chawlhsan nghal a, tsunami warning a awm avangin he hmun atanga fuel product pekchhuah pawh ni hnih khat chu a khaihlak tura ngaih a ni bawk.
Japan Meteorological Agency chuan lirnghin hnu lawkah Yonaguni island bul hnaiah tsunami wave 40 centimeters vela sang chu a insiam tiin a sawi a. A aia te zawk Ishigaki leh Miyako islands ah a insiam a ti bawk.
Taiwan earthquake monitoring agency chuan lirnghing chu 7.2 a tih laiin US Geological Survey chuan 7.4 a ti thung a, a nghin tanna chu Hualien chhim thlang lam 18 km velah niin lei hnuai 35 kilometers vela thuka nghing tan a ni a ti bawk. Aftershock tum tam tak thleng tawhin chung zingah chuan a na ber chu 6.5 magnitude niin lei hnuai 11.8 km a thuka nghing a ni a. Lirnghinna a pawnlang poh leh a tihchhiat a nasa thin.
Lirnghing chu Shanghai mai bakah China chhimchhak tuipui kamah te pawh hriat a ni tiin Chinese media te chuan an tarlang a. China leh Taiwan inkar hlat lam hi 160 kilometers vel niin China chuan Chinese mainland tan tsunami warning a pe ve lo thung.