Lirthei document fel lo tan khawngaihna hun hawng

Transport minister TJ Lalnuntluanga chuan chhiah pek loh avanga lirthei documents leh driving license thi tawh te tan late fee chawi loa fee pek theihna hun an hawng dawn tih a sawi.
Minister sawi danin, Mizoram pumah lirthei register 291883 a awm a. Heng zingah hian lirthei document nung lo, chhiah ba 89225 awmin, lirthei register zawng zawng zingah zaa 30 chu documents nung lo a ni. Driving licence 483312 zinga engemawzat chu renew ngai a ni tih a sawi bawk.
Road tax, passenger tax, goods tax, fitness fee leh permit fee chu a hun taka pek a nih loh chuan hremna pek an ngai thin tih sawiin, hrileng avangte, awmna hmun a hlat avang leh Mizoram mipui harsatna hrethiam chungin, chief minister Pu Zoramthanga chuan he khawngaihna hun hi kumin August 16 atanga December 31 thleng hawn a nih theihna’n a phalsak tih a sawi a. Lirthei documents fel lo leh driving license thi tawhte chu hemi hun chhung ngeia tifel vek turin an ngen tih a sawi a ni.
Transport department chhinchhiah danin, Aizawl district chu lirthei documents fel lo awm tlemna ber a ni a, zaa 22.2 chu lirthei documents fel lo an ni. Siaha leh Champhai district chu documents fel lo tamna ber niin zaa 64.6 chu an lirthei documents fel lo an ni.
Lirthei documents fel lo zawng zawngten an chhiah ba pek vek thei se Mizoramin hmasawnna hna engemawzat a thawh theih tur thu leh lirthei neituten chhiah an pek loh avangin Accountant General office-ah Transport department-in Audit Para an neih phah thin tih minister TJ Lalnuntluanga hian a sawi a ni.