Lirthei intlanchhawk leh a behbawm

Budget session kal mekah, transport minister-in member zawhna a chhanna atangin lirthei intlanchhawk kan hman hma leh kan hman hnua lirthei pun dan a lo lang a. Lirthei intlanchhawk hnuah lirthei hi a let deuh thuakin a pung. Chutih laiin, lirthei pun chak chhan hi intlanchhawk vang a nih leh nih loh erawh transport department lam chuan zirchianna an nei lo thung.
Zirchianna awm hran lo mah se, lirthei intlanchhawk hman a nih hnuah lirthei hi a pun chak tak em avangin intlanchhawk hian lirthei a tipung a nih a rinawm a, puh tur dang a awm hran lo niin a lang.
Session neih meka transport minister-in member zawhna a chhanna atanga lo lang ta chu, lirthei intlanchhawk hman hma kum 6 chhunga lirthei pun dan chu chawhrualin ni tin lirthei 28 register ang a ni a. Lirthei intlanchhawk hnuah erawh chawhrualin ni tin lirthei 50 register ang a ni.
Tunhma khan traffic tawt tihziaawm nan lirthei lei tur ten garage an nei ngei a ni tih finfiahna an nei tur a ni tih dan kha hman a ni a. Lirthei lei turte garage awmna lai pawh a hmuna endik a ni thin. Kawngsira lirthei inhung mai mai a tam avangin garage nei leh nei lo hriat nan, zan dar 11 hnu lama kawngsira lirthei inhungte pawh man a han ni rap rap a, garage nei anga insawi tam tak, kawngsira lo dah mai mai tawk kha an lo tam hle a ni awm e.
Kawngpui a sei belh thei tawh lova, a zau belh thei tawh hek lo. Khawpui chhung kawngpui junction khawi lai hmun hnih khat emaw te chu han siam rem theih ni bawk mah se, chu chuan awmzia a nei pha lo.
Parking area ni lo, kawngpui kama lirthei inhung thin hian traffic a tibuai tih hi a hrechiangtu chu traffic police te hi an nih a rinawm. Khawi laiah emaw traffic a han jam a, a chhan an han chhui zar zar a, a tawpah kawngsira lirthei lo inhung, a driver awm bawk si lo, a horn hmeh rik tuarh tuarh pawha driver hmel lo lang thei lawk lo; khawi lai kawngthlang or kawngchhaka mi ina thingpui ina lo chawl vel mai mai te kha an ni ta thin a.
Tun aia khauh zawk hian dan kenkawh ni ta se, kan ziaawm deuh chuan a rinawm.