Liverpool hmachhawn tur PSG
Champions League 16 play-off khelh zawh a ni a, last 16 lut a hriat kim hnuin last 16-a intum tur pawh chhunzawm a ni a. EPL hmahruaitu Liverpool chuan French champion Paris St-Germain an hmachhawn dawn. Hetihlai hian champion lai Real Madrid chuan Spain-a an elpui lian Atletico Madrid an hmachhawn dawn thung.
Last 16 ah hian English club pathum Liverpool, Arsenal leh Aston Villa ten ram dang club an hmachhawn vek dawn a, an intum rih lo. EPL hmahruaitu Liverpool in Paris St-Germain an hmachhawn dawn. Liverpool leh PSG te inkhela chak zawk zawk hian quarter-final-ah Aston Villa leh Club Brugge te inkhela chak zawk zawk an hmachhawn zui leh dawn a, an tan semi-final luh theihna kawng a inhawng zau viau tura a ngaih a ni.
EPL-a pahnihna ni mek Arsenal chuan Dutch club lian PSV Eindhoven an hmachhwn ang. Arsenal leh PSV te inkhela chak zawk zawk hian Real Madrid leh Atletico Madrid te inkhela chak zawk zawk an hmachhawn zui leh dawn a, semi-final lut turin fiahna hautak zawk an hmachhawn zui a ngai dawn. Arsenal hmachhawn tur PSV hi Italian Serie A club lian Juventus hnawtchhuaktu an ni a, an nem lo hle tura ngaih a ni.
Aston Villa in Belgian club lian Club Brugge an hmachhawn ve thung dawn. Aston Villa hmachhawn tur Club Brugge hi Europa Leaegue champion lai Atalanta hnawtchhuaktu an ni a, Villa nen hian an intum tawk viau tura ngaih a ni.
English club pathum ngawt an intum loh laiin La Liga club lian Real Madrid leh Atletico Madrid an intum dawn thung. Madrid khaw club lian pahnihte hi La Liga lamah pawh an inel tawk viau a, table-ah pahnihna leh pathumna an luah mek. Champions League last 16-ah an intum tur hi an hmuhnawm viau tura ngaih a ni. La Liga club lian pahnih Real Madrid leh Atletico Madrid te an inhmachhawn rual hian German club lian pahnih Bayern Munich leh Bayer Leverkusen te an inhmachhawn ve dawn bawk.
Last 16-ah FC Barcelona in Benfica an hmachhawn dawn a, quarter-final luh theihna hun tha zawk an nei thei tura ngaih a ni. Barcelona leh Benfica te an inhmachhawn lai hian Feyenoord leh Inter Milan an inhmachhawn ang a. Borussia Dortmund leh Lille te an inhmachhawn zui ve leh ang.
Champions League last 16 hi March ni 4 leh ni 5-ah first leg khelh a ni ang a, second leg hi March ni 11 leh ni 12 zanah khelh a ni ang