Liverpool in champion an hnaih leh zual

February 26, Nilaini zan khan English Premier League (EPL) 2024-25 khelh chhunzawm a ni a. Arsenal an chak zawh loh laiin hmahruaitu Liverpool in hnehna an chang nawn leh a. Point 13 zeta hmahruai fal tawh Liverpool hian champion an hnaih deuh deuh zel.
Pathianni zanah si hnih faia champion lai Manchester City hnehtu Liverpool hian Anfield-ah Newcastle United an mikhual. Reds hi an mualah an khel tha viau a, an goal thun khawl Mohamed Salah-an goal thun lo mah se season kal meka midfielder langsar pahnih; Dominik Szoboszlai leh Alexis Mac Allister te goal thun hmangin hnehna an chang a, an hmahruaina an tizau.
An hmahruaina tizau leh zual tura chak mamawh Liverpool hian champions league khelh phak tuma tan khawh Newcastle United lakah bul an tan tha viau a, inkhel tan atanga minute 11-na lekah midfielder khel tha tluang tak Dominik Szoboszlai chuan Luis Dia siamsak atangin hmahruaina goal a thun. Hma takah goal an thun vangin Liverpool an phur a, an inringtawk zui hle nghe nghe. Newcastle United hian hi an goal thun khawl Alexander Isak tel lova inlan an ni a, beisei angin an tlarhma a hriam tawk lo. Isak hmunruak luahtu Callum Wilson chuan goal thun theihna hun tha nei bawk mah se goal-ah a chantir thei lo. Hma takah goal a luh hnuin goal a luh belh thei lawk lova, Reds in 1-0 a hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal an thun leh thuai. Minute 63-naah an muallai luahlumtu player pawimawh Alexis Mac Allister chuan Mohamed Salah siamsak atangin an goal hnihna a thun a, an hmahruaina a tizau. Mac Allister goal thun hnu hian team hnihte goal thun tumin an innawr tawn nasa hle a. Goal hlauhawm, phut zawkna tur awm belh bawk mah se goal thun thei an awm tawh lo va, Liverpool chuan an mualah si hnih faiin hnehna an chang a, point thum hlu tak an hmu.
Arsenal an chak lo
An mualah Liverpool in hnehna an chan laiin pahnihnaa awm mek Arsenal chuan Nottingham Forrest lakah hnehna an chang zo lova, champion an beiseina a chuai deuh deuh zel.
Arsenal hi an hnuai chiaha awm Nottingham Forrest hmachhawn turin City Ground-ah an leng lut. An len luhna mualah khel chhe lem lo viau mah se a pawimawh ber goal an thun thei lo. Goal an thu theih loh bakah hun tawp dawn hnaihah penalty an beisei thlawn leh cheu bawk a, goal thun thei lovin inkhel an hmachhawn tluang.
An mahni hnaih bertu Arsenal an chak zawh loh laia an mualah Point thum an lo hmuh bik vangin Liverpool in champion an hnaih deuh deuh zel. Reds hian khelh 28 atangin point 67 an hmu a, an hnuai chiaha awm Arsenal aiin vawi khatin an khel tam zawk. Arsenal aiin khel tam zawk mah se hun pawimawhah an inchak theih hleih thung a, Arsenal in point hloh khut an hrat bawk si vanagin Arne Slot-a team Liverpool hian champion theihna hun tha zet mai an ni. EPL season kal mekah Arsenal tan point 33 hlawhchhuah theih a la awm a, Liverpool tan point 30 hlawhchhuah tur a la awm bawk. EPL 2024-25-ah champion tura inelna la tawp fel lo mah se champion theihna hun tha ber neitu chu Liverpool hi an ni.
Harsa in, pawm thiam har hle mah se Arsenal tan hreh tak chungin ‘Next season’ thlir a ngai leh dawn niin a lang. Arsenal hian player an nei chhe hran lo. EPL-a si nghak tha ber ni mek David Raya an nei a, defender tha ber ber; William Saliba, Grabriel leh Ricardo Calafiori te an nei bawk. Tlarhnung player an nei that rualin midfielder an nei tha thawkhat viau bawk. Chutiang bawkin tlarhma player pawh an nei chhe lo. An mamawh ber chu No. 9 position a khel tur, striker pangngai a ni. Striker pangngai nei lovin season chanve an hmang zo tawh, January thlaah inlak tharna hun remchang an nei. Champion tum tak tak ni se, sum tam tak seng pawhin thlasik bazarah striker la awm tak an ni a, mah se an la lo. Heti a nih vang hian Arsenal thuneitute hian champion tuma insawrbingna tak tak an nei lo niin a ngaih theih. Bakah Gunners hian champion zia a pu thei hlawl lova, hun pawimawhah an chesual leh khut thin. Chu chu a teuha an thamral thinna chhan lian tak a ni chiah bawk. Champion turin an insen ngam a ngai.